Madaxweyne Xasan oo sheegay in Maamulka Waqooyi-Bari uu xoojinayo midnimada

Soomaaliya, 29 September 2025 – Madaxweynaha Soomaaliya Xasan Sheekh Maxamuud ayaa sheegay in dhismaha maamulka cusub ee Waqooyi-Bari uusan ahayn kala go’, balse uu xoojinayo midnimada federaalka Soomaaliya.

Khudbad uu ka jeedinayay furitaanka kalfadhiga 7-aad ee Baarlamaanka Federaalka maanta, ayuu ku ammaanay bulshada Waqooyi-Bari oo ku guuleystay inay maamul ku dhisan did-u-heshiisiin iyo tanaasul sameystaan.

“Waxaan hambalyo iyo bogaadin u dirayaa shacabka Soomaaliyeed ee Waqooyi-Bari oo ku guuleystay inay dhistaan dowlad-goboleed federaal oo ka dhashay rabitaankooda, dib-u-heshiisiintooda iyo tanaasulkooda.” ayuu yiri madaxweynaha.

Madaxweynaha ayaa ugu baaqay hoggaanka maamulka cusub inay xoogga saaraan sugidda amniga, dib-u-heshiisiinta derisyada, iyo gaarsiinta adeegyada aasaasiga ah ee ay bulshada deegaanka u baahan yihiin:

“Waxaan ku boorinayaa maamulka cusub in mudnaanta koowaad la siiyo sugidda amniga, xoojinta dib-u-heshiisiinta laamaha deriska ah, iyo gaarsiinta adeegyada bulshada ee aasaasiga ah oo dadka deegaanka aad ugu baahan yihiin.” ayuu yiri.

Isagoo shacabka kale ee dalka dejinaya, Xasan Sheekh ayaa ku adkeeyay in dhismaha maamulka cusub uusan ahayn kala qaybin gobollada, balse uu yahay tallaabo lagu xoojinayo wada-shaqeynta iyo wada noolaanshaha federaalka:

“Dhismidda maamulka Waqooyi-Bari micnaheedu ma aha kala go’ ama ka fogaansho derisyada kale. Dowladda Federaalka waxay dadaal kasta ku bixin doontaa wax kasta oo fududeynaya wadashaqeynta, iyo nabad ku wada noolaashaha degaanadaas iyo kuwa dariska la ah ee horayba u ahaa wiil iyo waalid, xigto iyo xigaalo aan kala go’i karin” ayuu sheegay.

Madaxweynaha ayaa ballan qaaday in Dowladda Federaalka ay si buuxda u taageeri doonto maamulka Waqooyi-Bari si uu ula shaqeeyo maamulada deriska ah isla markaana si nabad ah ugu dhex milmo nidaamka federaalka qaranka