MUQDISHO (Dawan ) – Villa Somalia ayaa ku dhawaaqday in Madaxweynaha Jamhuuriyadda Federaalka Soomaaliya Xasan Sheekh Maxamuud uu hambalyo u diray Cabdiqaadir Axmed Aw-Cali (Firdhiye) iyo Cabdirashiid Yuusuf Jibriil (Abwaan) oo xildhibannada Woqooyi bari u doorteen Madaxweynaha iyo Madaxweyne ku xigeenka maamulka.
Qoraal kasoo baxay madaxtooyada maanta oo sabti ayuu Madaxweynaha ku bogaadiyay Golaha Wakiillada Woqooyi Bari, guddoonka iyo musharrixiintii ku tartamayay doorashada Laascaanood, isagoo tilmaamay in ay muujiyeen bisayl siyaasadeed.
Villa Somalia ayaa sheegtay in Madaxweynaha uu u rajeeyay hoggaanka cusub in ay noqdaan kuwo mideeya bulshada Woqooyi Bari, kana shaqeeya nabadda, horumarka iyo dowlad dhiska.
“Waxaan u rajeynayaa Madaxweyne Cabdiqaadir Axmed Aw-Cali iyo ku-xigeenkiisa Cabdirashiid Yuusuf Jibriil in ay noqdaan hoggaan mideeya bulshada Woqooyi Bari, kana shaqeeya nabadda, horumarka iyo dowladnimada,” ayaa lagu yiri bayaan ka soo baxay Villa Somalia.
