Madaxweynihii Hore Shariif oo sheegay in la isku dayey in la dilo

Soomaaliya, 27 Sebteembar 2025 – Madaxweynihii hore ee Soomaaliya, Shariif Sheekh Axmed, ayaa sheegay in israsaaseyntii ka dhacday saldhigga Warta-Nabadda ay ahayd isku day dil oo lagu doonayey in isaga iyo xubno kale lagu khaarajiyo.

Shariif Sheekh Axmed ayaa hadalkan ka sheegay shir jaraa’id oo uu habeennimadii Jimcaha qabtay, kaas oo uu uga hadlayey xiritaanno uu sheegay in lagu bartilmaameedsaday in ka badan 20 odayaal.

Madaxweynihii hore ayaa sharaxay inay saldhigga u tageen si ay damiin ugu noqdaan oday la xiray, balse halkaas lagu weeraray oo lagu isku dayey in la dilo.

“Waxaad la socotaan dhowaan waayeel la dilay, la jirdilay, la jiiday, oo dadkooda noo yimid annagoo booqanayna. Waxaa nagu dhacay in nala weeraro, la isku dayey in nala dil . Alle ayaa naga badbaadiyey,” ayuu yiri Shariif Sheekh Axmed.

Wuxuu intaas ku daray in, inkastoo ay iyagu ku celcelinayeen in rasaaas la ridin , haddana lagu furay xabbado.

Shariif dhacdadan uu ku tilmaamay inay ahayd isku day dil, waxa ay dhacday kadib markii qaar ka mid ah siyaasiyiinta mucaaradka Madasha Samatabixinta oo ciidamo wata ay tageen saldhigga Warta Nabadda, halkaas oo israsaaseyn dhexmartay iyaga iyo ciidankii saldhigga.

Dowladda Federaalka ayaa hore israsaaseyntaasi uga dhacday Warta Nabadda ugu sifeysay isku day afgambi oo ay qayb ka mid xubno ka tirsan Madasha Samatabixinta wadeen.