Washington – 8 Janaayo 2026 (Dawan)- Maamulka Madaxweynaha Mareykanka Donald Trump ayaa ku dhawaaqay in Maraykanku uu ka baxayo 66 urur oo caalami ah, isagoo ku tilmaamay go’aanka mid lagama maarmaan u ah ilaalinta “dhiigga, dhididka iyo hantida” shacabka Mareykanka.
War-saxaafadeed ka soo baxay Wasaaradda Arrimaha Dibadda Mareykanka, ayuu Xoghayaha Arrimaha Dibadda Marco Rubio ku sheegay in ururada laga baxayo ay yihiin kuwo “isku howl ah, si liidatana loo maamulo, isla markaana aan muhiim ahayn.” Wuxuu intaa ku daray in nidaam markii hore loogu talagalay nabadda caalamka uu isu beddelay “qaab ballaaran oo maamul caalami ah, oo inta badan ay hagaan fikrado ka fog danaha qaran.”
“Trump si cad ayuu u sheegay: ma aha wax la aqbali karo in dhiigga, dhididka iyo hantida shacabka Mareykanka lagu bixiyo hay’ado aan wax faa’iido ah muuqata aan lahayn,” ayuu yiri Rubio, isagoo xusay in waayihii malaayiinta doollar ee canshuur bixiyeyaasha lagu bixinayay dano shisheeye ay dhammaadeen.
Rubio ayaa si gaar ah u dhaliilay waxa uu ku tilmaamay mashruuc caalami ah oo ku dhisan aragtida “dhamaadka taariikhda,” isagoo sheegay in hay’ado badan oo caalami ah ay mudnaanta siinayaan ajendayaal ay ka mid yihiin kala-duwanaansho, sinnaanta iyo ka-qaybgalka , ololaha sinnaanta jinsiga, iyo siyaasadaha isbeddelka cimilada, halkii ay ka ilaalin lahaayeen madaxbannaanida dalalka xubnaha ka ah.
