Mareykanka iyo Itoobiya oo gaaray heshiis caafimaad oo dhan $1.6 bilyan

Addis Ababa 24 Diseembar 2025 (Dawan) — Dowladaha Itoobiya iyo Mareykanka ayaa kala saxiixday heshiis iskaashi oo dhanka caafimaadka ah, oo soconaya muddo shan sano, kaas oo lagu xoojinayo nidaamka caafimaadka Itoobiya, isla markaana lagu maalgelinayo adduun lacageed oo ka badan $1.6 bilyan.

Sida uu sheegay Wasiirka Maaliyadda Itoobiya Axmed Shide, dowladda Mareykanka ayaa bixin doonta ilaa $1.016 bilyan oo loo marinayo hay’adaha dowladda, halka Itoobiya ay kaga qeyb qaadan doonto $450 milyan oo ka imanaya kheyraadkeeda gudaha. Heshiiskan wuxuu soconaya muddada u dhexeysa 2026 ilaa 2030.

Wasaaradda Maaliyadda Itoobiya ayaa intaas ku dartay in dowladda Mareykanka ay sidoo kale bixin doonto $150 milyan oo deeqo ah taas oo ku xiran waxqabadka. Haddii si buuxda loo bixiyo, taageerada Mareykanka waxay gaari doontaa $1.166 bilyan, taas oo marka lagu daro doorka Itoobiya ka dhigeysa qiimaha guud ee heshiiska shanta sano ah $1.616 bilyan.

Wasiirka Caafimaadka Dr. Mekdes Daba ayaa sheegtay in heshiiskan uu dhisayo qaab iskaashi oo shan sano ah, kaas oo diiradda saaraya la-dagaallanka HIV AIDS, qaaxada, iyo u diyaar-garowga cudurrada faafa, iyadoo la xoojinayo nidaam caafimaad oo mideysan, islamarkaana adkaysi leh.

Waxay intaas ku dartay in heshiisku taageerayo dib-u-habaynta nidaamka caafimaadka, dhisidda awoodda xirfadlayaasha caafimaadka, ballaarinta maalgelinta gudaha, iyo helitaanka qalabka caafimaad ee lama huraanka ah.

Dr. Mekdes ayaa sidoo kale sheegtay in iskaashigan uu ku dhisan yahay guulihii la gaaray labaatankii sano ee la soo dhaafay, gaar ahaan daryeelka caafimaadka aasaasiga ah iyo adeegyada bulshada, isla markaana uu noqon doono qaab lagu joogteynayo maalgelinta iyo xoojinta nidaamka caafimaadka, si waafaqsan ajendaha dib-u-habaynta ee Itoobiya.

Danjiraha Mareykanka ee Itoobiya, Ervin Massinga, ayaa sheegay in heshiiskani uu muujinayo sida ay Washington uga go’an tahay taageeridda waaxda caafimaadka Itoobiya, isla markaana uu ka tarjumayo go’aanka Addis Ababa ee ah in ay ballaariso maalgelinta gudaha ee caafimaadka si loo xoojiyo joogtaynta iyo adkeysiga nidaamka caafimaadka dalka.