Mareykanka oo dib u bilaabaya gargaarkii bini’aadantinimo ee Soomaaliya

Washington, 29 Janaayo 2026 (Dawan) – Dowladda Mareykanka ayaa shaacisay inay dib u bilaabayso qaybinta gargaarka cunnada ee gudaha Soomaaliya kaas oo lasoo marsiin jiray Hay’adda Cuntada Adduunka (WFP) , sida uu sheegay Xafiiska Kaalmada Dibadda ee Mareykanka maanta oo Khamiis ah.

Qoraal lagu daabacay barta X, ayuu xafiisku ku sheegay in carqaladayntii hore ay saameysay gargaar uu Mareykanku maalgeliyay, balse hadda la go’aamiyay in keenista iyo qaybinta raashinka dib loo bilaabo, xilli Washington ay weli waddo dib-u-eegis ballaaran oo ku saabsan nidaamka gargaarka ay siiso Soomaaliya.

“Maamulka Trump wuxuu ilaalinayaa siyaasad adag oo ah inaan loo dulqaadan khasaare, xatooyo ama weecin lagu sameeyo hantida Mareykanka,” ayaa lagu yiri qoraalka kasoo baxay xafiiska.

Hay’adda Cuntada Adduunka (WFP) ayaa ah hay’adda ugu weyn ee bixisa gargaarka bini’aadantinimo ee Soomaaliya, iyada oo malaayiin qof ay ku tiirsan yihiin raashinka gargaarka ah, xilli dalka uu wajahayo dagaallo, abaaro iyo xaalado dhaqaale oo adag.

Hakinta ku-meel-gaarka ah ee gargaarka ayaa timid horraantii bishan, kadib markii la dumiyay qayb ka mid ah bakhaar ay WFP ku lahayd Dekedda Muqdisho, intii lagu jiray ballaarinta dekedda, arrintaas oo keentay in si ku-meel-gaar ah loo joojiyo gargaar raashin ah oo Mareykanku maalgeliyay.

Si kastaba ha ahaatee, dowladda Soomaaliya ayaa markii dambe sheegtay in raashinkii laga saaray bakhaarka dib loogu soo celiyay WFP, isla markaana hay’adda loo qoondeeyay bakhaar cusub si ay u sii waddo hawlaheeda gargaarka.