Washington (Dawan)— Maxkamad Mareykan ah ayaa xabsi daa'in ku xukuntay muwaadin Kenyan ah oo lagu magacaabo Cholo Cabdi Cabdullaahi (35 sano jir), kadib markii lagu helay dambiyo la xiriira qorsheyn weerar argagixiso oo la doonayay in laga fuliyo gudaha Mareykanka.
Maxkamadda Federaalka ee Koonfurta New York ayaa go'aanka xabsiga ah soo saartay 22 bishaan December, kadib markii lasoo dhamaystiray dhammaan cadeymaha dacwadihii loo haystay Cholo
Xeer-ilaalinta ayaa sheegtay in eedeysanaha uu ku guda jiray shirqool la doonayay in lagu afduubto diyaarad rakaab ah, si loogu adeegsado weerar ballaaran oo lagu bartilmaameedsanayo dhismo dhaadheer oo Mareykanka ku yaal. Qorshaha Cholo ayaa lagu tilmaamay mid u eg weeraradii 11 Sebtembar.
Sidoo kale, xeer-ilaalinta ayaa cadaysay in Cholo uu iskuul ku yaal dalka Filibiin kasoo bartay asaasiyaadka duulinta diyaaradaha, isla markaana uu qorsheynayay fulinta weeraro ka dhan ah Mareykanka. Waxyaabaha kale ee uu soo bartay waxaa ka mid ah amniga, qolalka diyaaradaha, habraacyada shirkadaha duulimaadyada, iyo farsamooyinka afduubka diyaaradaha.
