Qaahira (Dawan)– Wasiirka Arrimaha Dibadda ee Masar, Badr Cabdi Caadi, ayaa ugu baaqay Golaha Nabadda iyo Amniga ee Midowga Afrika inuu isagu yimaado kulan degdeg ah, si looga jawaabo tallaabada Israa’iil ay ku aqoonsatay Somaliland.
Wasiirka ayaa hadalkan ka jeediyay kulan fogaan-arag ah oo ay yeesheen wasiirrada arrimaha dibadda ee dalalka Midowga Afrika, isagoo si adag u cambaareeyay go’aanka Israa’iil, kuna tilmaamay xadgudub cad oo ka dhan ah sharciga caalamiga ah, Axdiga Qaramada Midoobay iyo Axdiga Aasaasiga ah ee Midowga Afrika.
Wasiirka Arrimaha Dibadda ee Masar ayaa sheegay in aqoonsigaas uu wiiqayo nabadda iyo amniga gobolka iyo kan caalamka, gaar ahaan Geeska Afrika, isla markaana uu khatar gelinayo xasilloonida gobolka. Wuxuu carrabka ku adkeeyay in tallaabooyinka hal-dhinac ah ay horseedi karaan qalqal amni iyo mid siyaasadeed.
Badr ayaa Midowga Afrika ugu baaqay in uu si degdeg ah oo mideysan uga jawaabo arrintan, si loo ilaaliyo madaxbannaanida iyo midnimada Jamhuuriyadda Federaalka Soomaaliya, loogana hortago fal kasta oo halis ku ah nabadda iyo xasilloonida gobolka.
