Soomaaliya, 29 Oktoobar 2025 — Dowladda Soomaaliya ayaa sheegtay in ay jiraan caqabado weli hortaagan hirgelinta Mashruuca Keydka Biyaha ee Jowhar (JOSP), oo ah mashruuc qaran oo lagu xoojinayo maaraynta biyaha iyo amniga cuntada ee wabiga Shabeelle.
Wasiirka Beeraha iyo Waraabka, Maxamed Cabdi Xayir (Maareeye), ayaa ka sheegay kulan heer sare ah oo Talaadadii lagu qabtay Muqdisho in mashruucu weli yahay mudnaanta koowaad ee dowladda, balse uu hakad ku yimid kaddib markii hay’adda USAID ay ka baxday maalgelinta.
“Mashruucaan waa nolosha dad badan o soomaliyeed ay ku xiran tahay haddii uu suuragalo,tan iyo markii USAID ay baxday, caqabado badan ayaan wajahney, balse kulankeenna maanta wuxuu ujeedkiisu ahaa in la helo xalal wax ku ool ah oo lagu dhammaystiro mashruuca,” ayuu yiri Wasiir Maareeye.
Mashruucan oo si wadajir ah u hogaaminayaan Wasaaradaha Beeraha iyo Waraabka iyo Tamarta iyo Biyaha, ayaa loogu talagalay in lagu yareeyo abaaraha iyo fatahaadaha, korna loogu qaado waxsoosaarka beeraha iyo adkaysiga isbeddelka cimilada ee wabiga Shabeelle.
JOSP wuxuu qorsheynayaa in uu ballaariyo helitaanka waraabka in ka badan 300,000 qof, yareeyo halista fatahaadaha ee saameeya 1.5 milyan oo qof, isla markaana uu gacan ka geysto adkaysiga abaarta ee ku dhow 1.65 milyan oo Soomaali ah.
Mashruuca waxaa lagu fulinayaa iskaashi ay la leeyihiin hay’adaha caalamiga ah sida FAO, IOM iyo kuwa Qaramad Midoobay, iyadoo maalgelin laga helayo Boqortooyada Ingiriiska, Sanduuqa Dhismaha Nabadda ee Qaramada Midoobay, iyo Sanduuqa Wadajirka Soomaaliya (SJF).
Barnaamijku wuxuu ka kooban yahay afar qaybood oo waaweyn oo maaligelintiisa ay kal qeebsaneeyeen Boqortooyada Ingiriiska, Sanduuqa Dhismaha Nabadda ee Qaramada Midoobay, iyo Sanduuqa Wadajirka Soomaaliya (SJF) iyo USIAD oo Albaabada la isku laabay hadda.
