Maxaa ku qasbay kumannaan Soomaali ah inay u barakacaan Itoobiya?

Soomaaliya 20 december 2025 (Dawan)- Hay’adda Cunnada iyo Beeraha Adduunka (FAO) ay shaacisay in in ka badan 55,800 qof oo Soomaali ah ay u barakaceen Itoobiya, sababo la xiriira abaar xooggan oo ka dhalatay roobabkii deyrta (Oktoobar–Diseembar 2025) oo aan ka di’in Soomaaliya.

FAO ayaa sheegtay in roob-yaraantaas ay si ballaaran u saameysay guud ahaan Geeska Afrika, iyadoo Soomaaliya ay noqotay dalka ugu daran ee ay abaartu ku dhufatay, taasoo dhalisay barakac gudaha ah iyo mid xuduudaha ka tallaabay. Hay’addu waxay ka digtay in xaaladda cunnada ay sii xumaan karto bilaha hore ee sanadka 2026, haddii aan la qaadin tallaabooyin degdeg ah.

Gudaha Soomaaliya, in ka badan 185,000 qof ayaa lagu qiyaasay inay ku barakaceen abaarta, halka tobannaan kun ay u gudbeen dalalka deriska ah, arrin sii adkaynaysa xaaladda bani’aadannimo ee gobolka. Sida ay FAO tilmaantay, barakaca xuduudaha ka gudbay wuxuu culeys dheeraad ah saaraya bulshooyinka martida loo yahay iyo kaabayaasha daryeelka.

Cyril Ferrand, oo ah madaxa kooxda adkeysiga Bariga Afrika ee FAO, ayaa sheegay in roob-yaraantu ay aad u saameysay dalalka Kenya, Itoobiya iyo Soomaaliya ay si wadajir ah, taasoo ku qasabtay bulshooyin badan oo reer miyi ah inay ka hayaamaan deegaannadoodii. “Qaar ka mid ah dalalkan waxay wajahayaan xilli roobaadkii ugu yaraa tan iyo 1981,” ayuu yiri Ferrand.

FAO waxay intaa ku dartay in roobab la’aantu ay durba keentay khasaare dalagyo ah iyo hoos u dhac ku yimid kobaca xoolaha, taasoo kordhinaysa halista gaajo iyo barakac hor leh. Hay’addu waxay ka digtay in haddii aan si degdeg ah loo xoojin gurmadka iyo maalgelinta, in abaartu ay isu beddeli karto dhibaato bani’aadannimo oo baaxad leh.

Dowladda Soomaaliya ayaa horay ugu dhawaaqday xaalad degdeg ah oo la xiriirta abaar ah, halka hay’adaha gargaarkuna ay walaac ka muujinayaan taageerada maaliyadeed iyo qorshaha ka hortagga oo aad u liita, xilli baahida gargaarku ay si xawli ah u sii kordhayso.