Maxay Masar uga dhigantahay ka qeybgalka AUSSOM?

Qahira 21 December 2025 (Dawan)- Madaxweynaha Masar, Cabdifataax Al-Sisi, ayaa shirkii labaad ee heer wasiirro ee Madasha Ruushka iyo Afrika ka sheegay muhiimadda ay u leedahay dalkiisa ka qeybqaadashada Hawlgalka Taageerada iyo Xasilinta Midowga Afrika ee Soomaaliya (AUSSOM). Waxa uu tilmaamay in mudnaanta ugu weyn ee Masar ay tahay in la xoojiyo xasilloonida Geeska Afrika iyo amniga maraakiibta isaga goosheysa Badda Cas, kuwaas oo ah tiirarka ugu muhiimsan ee nabadda gobolka iyo tan caalamiga ah.

Sisi wuxuu cadeeyay in Masar ay si firfircoon uga qeyb qaadan doonto Hawlgalka AUSSOM, iyada oo sidoo kale dadaal ku bixineysa sidii loo heli lahaa dhaqaalaha lagama maarmaanka u ah hawlgalka. Masar waxay geli doontaa booski ay ka baxday dowladda Burundi oo muddo dheer ka tirsaneed hawlgalka, inkasta oo ay dowladda Itoobiya walaac ka qabto soo dhawaanshaha Masar.

Madaxweyne Sisi ayaa sidoo kale xoojiyay in wadashaqaynta dalalka Afrika ee ka dhan ah caqabadaha amni iyo horumarineed ay muhiim tahay, isagoo tusaale u soo qaatay khibradda Masar ee la dagaallanka argagixisada oo saldhig u noqonaysa hawlgalkan.

Sidoo kale, Madaxweyne Sisi wuxuu carrabka ku adkeeyay in ka qeybgalka Masar ee AUSSOM uu ku dhisan yahay aragti dhameystiran oo isagu jirta dhinacyada amniga, horumarinta dhaqaalaha iyo fikirka, iyada oo laga faa'iideysanayo xarumaha dalkiisa ee ku lugta leh arriamahan sida Jaamcadda Al-Azhar iyo Xarunta Qahira ee xallinta khilaafaadka iyo dhismaha nabadda.