Hargeysa (Dawan)- Wasaaradda Arrimaha Dibadda Somaliland ayaa sheegtay inay si hoose ula socotay wadahadalladii Ankara uga socday dowladaha Soomaaliya iyo Itoobiya ee ku saabsanaa sidii xal looga gaari lahaa xiisadda ka dhalatay is-afgaradkii badda ee dhex maray Itooobiya iyo Somaliland horaantii sannadkan.
"Waxaan si dhow ula soconnay wada-hadallada ka socday Turkiga oo ah dadaallo dhexdhexaadin ah oo u dhexeeya Maamulka Muqdisho iyo Itoobiya oo billowday Isniintii Agoosto 12. Waxaa cad in wadahadallada aysan keenin natiijooyinkii uu rabay Turkiga" ayaa lagu yiri, war-saxaafadeed kasoo baxay Wasaaradda.
Wasaaradda ayaa intaas ku dartay in Somaliland ay ka go'antahay hirgelinta heshiiska isfaham ee ay wadagaleen Itoobiya, waxeyna Turkiga ku eedeysay inuusan dhexdhexaad ka ahayn siyaasadda gobolka
War-saxaafadeedka wasaaradda waxaa lagu sheegay in Somaliland ay xaq u leedahay inay gasho heshiisyo caalamiya, iyada oo loogu baaqay Turkiga iyo dowladaha kale in aysan soo faragelin arrimaha Somaliland.
Madaxweynaha Somaliland, Muuse Biixi Cabdi ayaa dhawaan ku eedeyay Turkiga inuu faragelin ku sameeyay qaranimada Somaliland, xilli uu booqasho ku marayay magaalada Berbera ee gobolka Saaxil.
Biixi ayaa ku tilmaamay qorshaha uu Turkigu damacsanyaahay inuu ku heshiisiiyo Somaaliya iyo Itoobiya mid aan suurtagal ahayn oo ay kasoo horjeedaan madaxda iyo shacabka Somaliland.
“Somaliland baa Xamar looga talinaya, waa qorraxdii oo galbeed kasoo baxday, mana suurtoobeyso:” ayuu yiri, Madaxweyne Muuse.
Somaliland iyo Itoobiya ayaa kala saxiixday heshiis ay Itoobiya ku gaareyso badda, Somaliland-na ku heleyso aqoonsi iyo saami shikradda diraadaha Ethiopian Airlines 1-dii bishii January 2024.
