Maxkamadda Gobolka Banaadir oo laashay waarankii soo qabashada ee Axmed Madoobe

Muqdisho (Dawan) – Maxkamadda Gobolka Banaadir ayaa maanta oo Khamiis ah si rasmi ah u laashay dacwad ciqaabeed iyo waaran soo qabasho ah oo horay looga soo saaray Madaxweynaha Dowlad-goboleedka Jubaland, Axmed Maxamed Islaam (Axmed Madoobe).

Go’aankan, oo ka soo baxay xafiiska Guddoomiyaha Maxkamadda Gobolka Banaadir, ayaa lagu sheegay in gal-dacwadeedkii loo haystay Axmed Madoobe gebi ahaanba la xiray, kaddib codsi ka yimid Xafiiska Xeer-ilaaliyaha Guud ee Qaranka.

Sida ku cad dukumiinti maxkamadeed, xeer-ilaalintu ayaa maanta si rasmi ah u codsatay in la xiro galka dacwadda. “Maxkamaddu waxay baabi’isay amarkii soo qabashada iyo horkeenista maxkamadeed ee horay looga soo saaray eedeysane Axmed Maxamed Islaam,” ayaa lagu yiri qoraal uu saxiixay Ku-xigeenka Guddoomiyaha Maxkamadda Gobolka Banaadir.

Axmed Madoobe ayaa horay loogu eedeeyay dambiyo la xiriira qiyaano qaran iyo falal ka dhan ah qarannimada iyo habraaca maamulka, eedeymahaas oo ku soo aaday xilli uu jiray khilaaf siyaasadeed oo muddo soo jiitamayay oo u dhexeeyay dowladda Federaalka Soomaaliya iyo hoggaanka Jubaland, gaar ahaan arrimaha doorashooyinka iyo hirgelinta nidaamka federaalka.

Waaranka hadda la laalay ayaa markii hore soo baxay bishii Nofeembar 2024, xilli khilaaf xooggan uu ka taagnaa Villa Soomaaliya iyo Kismaayo, gaar ahaan muranka ku saabsan hanaanka doorashooyinka “qof iyo cod”.

Go’aankan maxkamadeed ayaa imanaya iyadoo la filayo in Axmed Madoobe uu dhowaan yimaado magaalada Muqdisho, si uu uga qeyb galo shirka wadahadallada u dhexeeya dowladda federaalka iyo Golaha Mustaqbalka Soomaaliya, kaas oo la qorsheeyay inuu furmo 1-da Febraayo 2026.