Mercy Corps oo ari ku qeybisay qoysas ku xoola beelay abaarta Dowlad Deegaanka Soomaalida

Jigjiga, 14 December 2025 (Dawan)- Hay’adda gargaarka iyo horumarinta ee Mercy Corps ayaa 584 qoys oo ku nool Degmada Abaaqarow ee Dowlad-Deegaanka Soomaalida u qaybisay 2,920 neef oo ari ah, si loo taageero qoysaska xoolo-dhaqatada ah ee ay saameeyeen abaaraha soo noqnoqday.

Qoys walba waxa uu helay shan (5) neef oo ari ah, kuwaas oo isugu jira lab iyo dheddig , taas oo qeyb ka ah barnaamijyada dib-u-kabasho degdeg ah ee ay hay’addu ka fuliso deegaannada ay abaaruhu sida daran u saameeyeen.

Mashruucan ayaa ujeedkiisu yahay in la yareeyo saameynta abaaraha sanadihii u dambeeyay, kuwaas oo si weyn u waxyeelleeyay xoolihii iyo hab-nololeedkii qoysaska ku nool Degmada Abaaqarow iyo guud ahaan Dowlad-Deegaanka Soomaalida.

Mercy Corps ayaa sheegtay in qaybinteedu si gaar ah diiradda u saartay qoysaska nugul ee ku tiirsanaa xoolaha, balse xoolohoodi ku waayay abaaraha isdaba-joogga ah, iyada oo looga gol leeyahay in dib loogu dhiso awooddooda nololeed iyo is-ku-filnaansho.

Guddoomiyaha Degmada Abaaqarow , Cabdullaahi Aadan Khaliif, ayaa sheegay in mashruucan uu door weyn ka qaadan doono dib-u-dhiska nolosha bulshada.

“Waxaan rumeysan nahay in deeqdan ay wax weyn ka tari doonto nolosha qoysaska ka faa’iideystay, gaar ahaan kuwa sida tooska ah ay abaartu u saameeysay,” ayuu yiri Guddoomiyuhu.

Barnaamijka ayaa sidoo kale lagu xoojiyay tababarro ku saabsan daryeelka xoolaha, si loo hubiyo in ariga la bixiyay si wanaagsan loo dhaqo, una tarmaan, isla markaana u kordhiyaan wax-soo-saarka qoysaska, gaar ahaan dhinacyada nafaqada, dakhliga, iyo adkaysiga nololeed.

Mercy Corps ayaa intaa ku dartay in mashruucani uusan ku koobnayn oo kaliya Degmada Abaaqarow , balse uu qeyb ka yahay barnaamij ballaaran oo ay hay’addu ka fuliso deegaannada Dowlad Deegaanka Soomaalida, kaas oo diiradda saaraya biyo nadiif ah, fayadhowr, caafimaadka xoolaha, tallaalka, iyo xoojinta adkaysiga bulshooyinka nugul.

Qaybinta ariga ayaa loo arkaa mid kor u qaadaysa wax-soo-saarka xoolaha, isla markaana gacan ka geysan doonta in qoysaska ka faa’iideystay ay dib u helaan nolol wanaagsan.