Itoobiya, Oktoobar 15 2025 — Guddoomiyaha Guddiga Midowga Afrika, Maxamud Cali Yuusuf, ayaa Talaadadii si rasmi ah u furay Toddobaadka Xirfadaha Afrika 2025 ee magaalada Addis Ababa.
Munaasabaddan ayaa diiradda saaraysa horumarinta xirfadaha, hal-abuurnimada, iyo tignoolajiyada si loo taageero koboc dhaqaale oo waara. Guddoomiyuhu wuxuu sheegay in mustaqbalka Afrika uu ku xiran yahay maalgashiga dhallinyarada iyo xoojinta aqoonta, tiknoolajiyada, iyo hal-abuurnimada, kuwaas oo muhiim u ah warshadeynta iyo koboca loo dhan yahay ee qaaradda.
Intii lagu jiray furitaanka, waxaa si rasmi ah loo daah-furay Istaraatiijiyadda Qaaradda 2025–2034, oo loogu talagalay in dhallinyarada Afrika lagu qalabeeyo xirfado dijitaal ah, cagaaran, iyo kuwo la jaanqaadaya cimilada, si loo hirgeliyo Heshiiska Ganacsiga Qaaradda Afrika (AfCFTA) iyo Ajandaha 2063: Afrika Aan Doonayno.
Toddobaadka Xirfadaha Afrika waa barnaamij sanadle ah oo ay hoggaamiso Midowga Afrika, kaas oo isku keena macallimiin, hogaamiyeyaal warshadeed, iyo dhalinyaro si loo xoojiyo tababarka farsamada, aqoonta dijitaalka, iyo xirfadaha cagaaran. Barnaamijku wuxuu muujinayaa muhiimadda dhallinyarada Afrika, oo ka badan 60% dadka qaaradda ka yar yihiin 25 sano, si loo abuuro mustaqbal dhaqaale oo horumarsan, teknolojiyad ku saleysan, iyo hal-abuurnimo.