Midowga Afrika oo ku baaqay in la joojiyo dagaalka ka qarxay gobolka Tigray

Itoobiya (Dawan) – Midowga Afrika ayaa ugu baaqay dhammaan dhinacyada ku sugan gobolka Tigray ee Itoobiya inay muujiyaan is-xakameyn buuxda, kaddib dagaalladii kasoo cusboondaay gobolka, wuxuuna ka digay tallaabo kasta oo wiiqi karta geeddi-socodka nabadda.

Guddoomiyaha Midowga Afrika, Maxamuud Cali Yuusuf, ayaa bayaan uu soo saaray ku sheegay inuu si dhow ula socdo xaaladda ka taagan gobolka, isaga oo muujiyay walaac xooggan oo ku aaddan dhacdooyinkii ugu dambeeyay.

Maxamuud Cali Yuusuf ayaa carrabka ku adkeeyay muhiimadda joogtada ah ee ilaalinta guulihii laga gaaray Heshiiskii Joojinta colaadaha, oo Midowga Afrika dhexdhexaadiyay, kaas oo dhex maray Dowladda Itoobiya iyo Jabhadda Xoreynta Shacabka Tigray, 2-dii Nofeembar 2022.

Bayaanka ayaa ugu baaqay dhammaan dhinacyada inay ka fogaadaan tallaabo kasta oo dhaawici karta kalsoonida, isla markaana arrimaha weli taagan lagu xalliyo wadahadal miro-dhal ah, iyagoo si buuxda u ixtiraamaya qodobbada heshiiska.

Midowga Afrika ayaa mar kale adkeeyay sida uu uga go’an yahay hirgelinta heshiiskii horay loo gaaray, wuxuuna xaqiijiyay inuu sii wadi doono taageerada dhammaan dhinacyada inta lagu jiro marxaladaha dhismaha nabadda iyo dib-u-heshiisiinta.

Ugu dambayn, Midowga Afrika ayaa ku dhawaaqay diyaar u ahaanshihiisa inuu xoojiyo dadaallada ku aaddan fududeynta wadahadalka, iskaashiga iyo dhisidda kalsoonida, si loo xaqiijiyo nabad iyo xasillooni waarta oo ka hanaqaada gobolka Tigray ee Itoobiya