Muqdisho (Dawan) – Guddiga Midowga Afrika (AUC) ayaa xaqiijiyay geerida shan askari oo ka tirsan ciidamada AUSSOM kadib shil helikobtar oo ka dhacay Muqdisho 2-dii Luulyo 2025. Shilka ayaa dhacay markii helikobtar ay wadeen ciidamada Uganda ee ka tirsan Hawlgalka Midowga Afrika ee Xasilinta iyo Taageerada Soomaaliya (AUSSOM) ay ku dhacday meel u dhow garoonka diyaaradaha caalamiga ah ee Aden Abdulle ee Muqdisho.
Qoraal ka soo baxay Guddoomiyaha Guddiga Midowga Afrika, Mahmoud Ali Youssouf, ayaa muujiyay sida ay uga xunyihiin geerida askarta nabadsugida ah ee ku dhimatay shilkaas. Guddoomiyaha ayaa tacsi u diray qoysaska ay ka geeriyoodeen, dowladda iyo shacabka Uganda, iyo guud ahaan AUSSOM.
“Geerida askarta nabadsugida ah ee geeriyooday waa mid naxdin leh, waxaanan tacsi u dirayaa qoysaskooda iyo dhammaan kuwa ay ka geeriyoodeen,” ayuu yiri Guddoomiyaha Youssouf qoraalka. “Waxaan sidoo kale u rajeynayaa caafimaad degdeg ah dadka dhaawacmay, oo ay ku jiraan dadka rayidka ah ee ay shilkaas saameysay.”
Ciidamada AUSSOM ayaa horay u xaqiijiyey in saddex ka mid ah sideeda ruux ay si degdeg ah u badbaadiyeen, kuwaas oo loo qaaday isbitalka AUSSOM ee Muqdisho si loogu bixiyo daryeel caafimaad.
Helikobtar-kan ayaa oo ka soo kacday saldhigga Balidoogle ee gobolka Shabeellaha Hoose, iyadoo ku burburtay agagaarka garoonka diyaaradaha caalamiga ah ee Aden Abdulle ee Muqdisho. Baaritaanno ayaa socda si loo ogaado sababaha keena shilkaan oo weli aan la aqoon.
