Muqdisho (Dawan) – Duqeyn diyaaradeed oo ka dhacday degmada Jilib ee gobolka Jubbada Dhexe 10-kii Diseembar 2025 ayaa lagu dilay Injineer Cabdullaahi Cismaan Maxamed, oo loo yaqaan Injineer Ismaaciil, kana mid ahaa hoggaamiyeyaasha ugu sarreeya ee kooxda Al-Shabaab, gaar ahaan dhinaca amniyaadka iyo howlgalada qarsoon.
War-saxaafadeed caawa ka soo baxay Hay’adda Nabad-sugidda iyo Sirdoonka Qaranka (NISA) ayaa lagu xaqiijiyay geeridiisa, iyada oo la sheegay in howlgalka ay fuliyeen saaxiibada caalamiga ah, isla markaana uu garab ka ahaa sirdoonka Soomaaliya. Isla duqeyntaasi waxaa sidoo kale lagu dilay Cabdikariin Maxamed Xersi, oo loo yaqaan Qoorleex, kana tirsanaa waaxda wacyigelinta iyo abaabulka Al-Shabaab ee deegaannada Jubbooyinka.
Injineer Cabdullaahi Cismaan waxa uu Al-Shabaab kasoo qabtay jagooyin kala duwan oo xasaasi ah, kuwaas oo isugu jiray dhinacyada farsamada, warbaahinta iyo amniga. Xilliyadii hore wuxuu ahaa madaxa samaynta qaraxyada iyo farsamada hubka, taas oo ka dhigtay shaqsi door weyn ku lahaa weerarro badan oo ka dhacay gudaha Soomaaliya.
Kadibna wuxuu noqday madaxa warbaahinta kooxda, halkaas oo uu ka hagayay faafinta fariimaha Al-Shabaab iyo wararka la xiriira howlgaladeeda. Sanadihii u dambeeyay, Injineer Ismaaciil ayaa loo magacaabay madaxa amniyaadka Al-Shabaab, jagadan oo ka dhigtay mas’uulka ugu sarreeya ee qorsheynta, kormeerka iyo fulinta weerarrada waaweyn ee kooxda.
Ilo rasmi ah ayaa sheegaya in hoggaamiyahan lagu tilmaami jiray “maskaxda” ka dambeysa hawlgallada ugu khatarsan ee Al-Shabaab, isagoo sidoo kale xiriir dhow la lahaa ururka Al-Qaacida, isla markaana kaalin muhiim ah ka ciyaaray xiriirinta labada dhinac.
