Muxuu u codeyn waayay Ra’iisul Wasaaraha Soomaaliya?

Muqdisho (Dawan)- Ra’iisul Wasaaraha Soomaaliya, Xamse Cabdi Barre, maanta kama qeybgalin codeynta doorashada tooska ah ee golayaasha deegaanka ee Gobolka Banaadir, sababta oo ah ma uusan iska diiwaan gelin gobolka Banaadir.

Sida ay Dawan ogaatay, Xamse ayaa qorsheynaya in uu iska diiwaan geliyo magaalada Kismaayo, halkaas oo uu ka codeyn doono, maadaama Kismaayo ay tahay deegaan doorashada u qoondeysan Ra’iisul Wasaaraha ahna Gudoomiyaha ku-xigeenka ururka siyaasadeed ee Cadaaladda iyo Wadajirka.

Xarunta ku meel gaarka ah ee dowlad goboleedka Jubaland ee Kismaayo, lama laha xiriir toos doorashada maanta ka socota Muqdisho, maadaama maamulka uu hoggaamiyo Madaxweyne Axmed Maxamed Islaam uu horay uga soo horjeestay hannaanka loo maray doorashada. Khilaafkaas ayaa saameyn ku yeeshay xiriirka Kismaayo iyo dowladda dhexe.

Go’aanka Xamse wuxuu muujinayaa in rajada ah in Kismaayo ay qeyb ka noqoto doorashooyinka ay dowladda federaalka qorsheysay inay ka qabato dowlad goboleedyada dalka. Kismaayo Sanad ka hor waxaa ka qabsoomay doorasho dib loogu doortay Axmed Madoobe basle ay diiday dowladda dhexe, taas oo keentay inuu go’o xiriirkii wadashaqaynta tooska ahaa.

Si kastaba ha ahaatee, doorasho Kismaayo ka dhacda waxay u baahan doontaa heshiis ka dhaxeeya Axmed Madoobe iyo dowladda dhexe, taas oo u muuqata arrin adag marka la eego halka ay aragtiyahooda siyaasadeed ka kala joogaan maanta.

Inkasta oo uusan codeyn Raiisul Wasaare Xamse hadana kama baaqanin inuu kormeer ku tago degmooyinka ka mid ah kuwa ay ka socoto cod-bixinta doorashada goleyaasha deegaanka Gobolka Banaadir.