Istanbul (Dawan)– Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa sheegay in Somaliland ay Israa’iil kula heshiisay in ay qaabisho Falastiiniyiinta si qasab ah loosoo barakicinayo iyo saldhig militari , beddelkeedana ay ka hesho aqoonsi rasmi ah, sida uu sheegay, iyadoo lagu salaynayo xog sirdoon.
Wareysi gaar ah oo uu siiyay telefishinka Al Jazeera ee dalka Qadar, ayuu madaxweynuhu ku tilmaamay aqoonsiga ay Israa’iil siisay Somaliland mid “lama filaan ah oo yaab leh,” isaga oo xusay in uu si kedis ah ku yimid, isla markaana Israa’iil ay noqotay dhinacii ugu horreysay ee Somaliland aqoonsi siisa tan iyo 1991-kii.
Dowladda Federaalka Soomaaliya ayaa si cad u diidan sheegashada madaxbannaanida Somaliland, waxayna u aragtaa xiriir kasta oo toos ah oo lala yeesho inuu xad gudub ku madax-bannaanida iyo midnimada dalka.
“Waxaan ku dadaaleynaa dib-u-midaynta dalka si nabad ah,” ayuu yiri Madaxweyne Xasan Sheekh.
Madaxweynaha ayaa sidoo kale sheegay in Somaliland ay aqbashay ku biirista Heshiisyada Abraham, kuwaas oo la saxiixay sannadkii 2020-kii, kana dhexeeya Israa’iil iyo Imaaraadka Carabta, Baxreyn, Suudaan iyo Morocco, kuwaas oo caadi looga dhigay xiriirka ay dowladahan la leeyihiin Israa'iil.
