Muqdisho (Dawan) – MyBank ayaa si rasmi ah u shaacisay in macaamiisheedu si toos ah uga heli karaan akoonnadooda bangiga app-ka Waafi, oo ah e-wallet dhammeystiran oo ay maamusho shirkadda Hormuud Telecom. Isku xirkaas, oo la shaaciyey Khamiistii, ayaa MyBank ku xira in ka badan laba milyan oo adeegsade Waafi ah guud ahaan Soomaaliya — taasoo ah ballaarin weyn oo dhanka dijitaalka ah.
Iskaashigan wuxuu ka dhashay heshiis rasmi ah oo la kala saxiixday bishii Oktoobar 2024, intii lagu guda jiray shirkii "Somali Winners Conference", halkaas oo MyBank iyo Hormuud ay ku heshiiyeen in la isku xiro nidaamyadooda bangiyada iyo lacagaha dijitaalka ah. MyBank wuxuu noqday bangigii ugu horreeyay ee si buuxda u shatiyeysan oo ka baxsan shirkadaha Hormuud oo si toos ah ula midooba barnaamijka Waafi.
Iskaashigan wuxuu u oggolaanayaa macaamiisha MyBank inay sameeyaan adeegyo badan — sida baarista haraaga, wareejinta lacagaha, iyo bixinta biilasha — iyagoo adeegsanaya Waafi, iyagoon u baahnayn in ay tagaan laamaha bangiga. Tani waxay la jaanqaadaysaa dadaallada qaranka ee lagu ballaarinayo adeegyada maaliyadeed, maadaama xogta Bangiga Adduunka ay muujinayso in ka yar 15% dadka waaweyn ee Soomaaliyeed ay haystaan akoon bangi rasmi ah.
Maamulaha guud ee MyBank, Cabdullaahi Maxamed Axmed, ayaa u sheegay Dawan in:
“Isku xirnaanta hay’adaha maaliyadeed waxay fududaynaysaa nolosha muwaadiniinta, waxayna door weyn ka ciyaartaa kordhinta tirada dadka adeegsada adeegyada bangiyada rasmi ah, taas oo wali aad u yar dalka oo dhan.”
Waafi, oo ay Hormuud soo saartay, wuxuu isku daraa adeegyada lacagta moobilka, bixinta lacagaha, isgaarsiinta, iyo madadaalada. Barnaamijku wuxuu dhaafay hal milyan oo download ah, wuxuuna bishii celcelis ahaan ka shaqeeyaa in ka badan 155 milyan oo macaamil ah, oo qiimahoodu gaarayo $2.7 bilyan. Adeegyada lacagta moobilka ayaa ah kuwa ugu badan ee la isticmaalo Soomaaliya, iyadoo illaa 87% bulshada ay adeegsanayaan, halka kaliya 15% ay haystaan akoon bangi. Sidoo kale, heerka isticmaalka moobilka ee dalka ayaa kor u dhaafay 70%, sida lagu sheegay xogta GSMA.
MyBank, oo la aasaasay sannadkii 2018, waxaa loogu talagalay in lagu yareeyo farqiga baahida adeegyada maaliyadeed ee Soomaaliya, taasoo lagu qiyaasay $2.2 bilyan, wuxuuna leeyahay shati rasmi ah oo uu ka heesto Bangiga Dhexe ee Soomaaliya. Wuxuu sidoo kale maalgeliyey kaabayaasha dijitaalka ah, isaga oo qorsheynaya inuu ku fido guud ahaan dalka.
Isku xirka Waafi wuxuu qeyb ka yahay qorshaha istaraatiijiyadeed ee shanta sano ee MyBank, si loo ballaariyo adeegyada dijitaalka ah, loogana faa’iideeyo bulshada aan hore u helin adeegyo bangi oo rasmi ah.
