Nairobi iyo Addis Ababa oo ballaarinaaya iskaashiga laba geesoodka ah

Addis Ababa (Dawan)- Madaxweynaha Kenya, William Ruto, ayaa maanta oo Talaadado ah booqasho shaqo oo hal maalin ah ku tagay caasimadda Itoobiya ee Addis Ababa, halkaas oo uu wadaxaajood kula yeeshay Ra’iisul Wasaaraha Itoobiya, Abiy Axmed, si loo ballaariyo iskaashiga dhinacyada siyaasadda, dhaqaalaha iyo amniga.

Ra’iisul Wasaare Abiy ayaa booqashada Ruto ku tilmaamay mid ka tarjumaysa “xiriirka qotada dheer, taariikhiga ah iyo walaaltinimada” ka dhaxeysa Itoobiya iyo Kenya. Qoraal uu ku baahiyay baraha bulshada, Abiy wuxuu sheegay in wadahadalladu diiradda saareen xoojinta xiriirka laba geesoodka ah iyo adkeynta go’naaka wadajirka ah ee lagu ilaalinayo nabadda iyo xasilloonida Geeska Afrika.

Ra’iisul Wasaaruhu wuxuu carrabka ku adkeeyay in booqashadu muujisay mowqifka mideysan ee lagu baadi goobayo xaqiijinta xal u helidda dhibaatooyinka ka jira gobolka ee xiisadaha siyaasadeed iyo caqabadaha bini’aadantinimo ee soo noqnoqday.

Wadahallada Itoobiya iyo Kenya — Ruto iyo wafdigiisa oo wada hadal kula jira Abiy iyo wafdigiisa

Dhinaca kale, wadahadalladu waxay ku soo beegmeen xilli iskaashiga dhaqaale ee u dhexeeya Nairobi iyo Addis Ababa uu sii ballaaranayo. Horaantii bishan, labada dowladood waxay kala saxiixdeen heshiis ganacsi , kaas oo ujeedkiisu ahaa in la yareeyo caqabadaha ku horgudban ganacsatada yaryar iyo kuwa aan rasmiga ahayn ee ka jira xadka labada dal.

Heshiiskaas, oo lagu saxiixay magaalada Addis Ababa 19-kii Diseembar, ayaa la filayaa inuu kor u qaado nolosha bulshooyinka ku nool xuduudaha, isla markaana xoojiyo xiriirka bulsho ee labada dal.

Shirkadaha ganacsiga ee Kenya ayaa bilaabay inay si dardar ah ku galaan suuqa Itoobiya kadib markii Addis Ababa ay albaabada u furtay maalgashiga ajnabiga isla markaana ay fududeysay hanaanka ganacsiga.

Bankiga Ganacsiga Kenya ayaa hiigsanaya inuu Bankiyada Itoobiya ku yeesho saami gaaraya 40% taas oo qeyb ka ah istaraatiijiyad ballaaran oo bankiyada Kenya ay ku doonayaan inay ku ballaariyaan saamaynta ganacsi ee gobolka.

Iyaga oo ka mid ah dowladaha ugu saamaynta badan Bariga Afrika, Kenya iyo Itoobiya waxay weli u arkaan iskaashigooda mid laf-dhabar u ah isdhexgalka gobolka iyo xasilloonidiisa.