New York (Dawan)— Ninka ugu taajirsan dunida, Elon Musk, ayaa ku baaqay in la soo xiro Safiirka Soomaaliya u fadhiya Qaramada Midoobay, Abuukar Daahir Cismaan, kaddib eedeymo lagu baahiyay baraha bulshada oo la xiriira musuqmaasuq dhaqaale oo ka dhacay Maraykanka, arrintan oo dhalisay dood siyaasadeed oo ballaaran xilli Soomaaliya ay tahay Guddoonka Golaha Ammaanka ee Qaramada Midoobay.
Baaqan oo Musk ku qoray bartiisa X (horay loo yiqiin Twitter) ayaa la xiriira eedeymo sheegaya in Abuukar Daahir uu horey uga tirsanaa shirkad caafimaad oo Maraykan ah, taasoo lagu eedeeyay ku lug lahaansho musuqmaasuqa barnaamijka Medicaid. Musk ayaa si cad u dalbaday in tallaabo sharci ah laga qaado safiirka, inkastoo aanay jirin wax dacwad rasmi ah oo ilaa hadda lagu oogay.
Sida ay sheegayaan warbixinno ku faafay baraha bulshada, Cismaan ayaa la sheegay inuu la shaqeyn jiray shirkad lagu magacaabo Progressive Health Care Services Inc. oo ka hawlgeli jirtay gobolka Ohio intii u dhexeysay sannadihii 2014 ilaa 2019. Si kastaba ha ahaatee, hay’adaha dowladda Maraykanka kama aysan soo saarin wax war ah oo xaqiijinaya in Cismaan uu si toos ah ugu lug lahaa falal sharci-darro ah ama in dacwad lagu oogay.
