Dhanaane (Dawan ) – Hay’adda Sirdoonka iyo Nabadsugidda Qaranka Soomaaliya (NISA) ayaa sheegtay in cutubka gaarka ah ee Gaashaan uu xalay hawlgal qorsheysan ka fuliyay deegaanka Dhanaane ee gobolka Shabeellaha Hoose, kaas oo lagu burburiyay xarun ay kooxda Al-Shabaab u isticmaali jirtay kaydinta waxyaabaha qarxa.
War qoraal ah oo NISA soo saartay Isniintii ayaa lagu sheegay in howlgalka lagu saleynayay "xog sirdoon oo la xaqiijiyay," taasoo muujisay in goobtaasi laga abaabulayay weerarro lagu bartilmaameedsanayo shacabka Soomaaliyeed.
Howlgalkaas laguma soo warin wax khasaare rayid ah. Mas’uuliyiinta hay’addu waxay sheegeen in hawlgalka uu ahaa mid looga hortagayo shirqool amni oo weyn.
