OCHA oo Ka Digtay Dhibaatooyinka Bini'aadantinimo ee Puntland

Puntland, Soomaaliya – Hay’adda Qaramada Midoobay ee Isku-duubnaanta Gargaarka Bini’aadantinimo (OCHA) ayaa shaacisay in 800,000 oo qof oo ku nool Puntland ay wajahaan dhibaatooyin bini’aadantinimo oo ba’an, iyadoo xaaladda ka sii dareysay sababo la xiriira abaaraha iyo colaadaha ka socda gobolka.

OCHA ayaa sheegtay in dhibaatooyinkaas ay ka dhasheen roobabkii Deyr ee 2024 oo hoos u dhacay iyo saadaasha xun ee roobabka Gu’ga 2025, taasoo keentay in dadka iyo xoolaha ay wajahayaan dhibaatooyin ba’an oo ku saabsan helitaanka biyo, cunto, iyo daaqsin. Waxaana sidoo kale sii xoojiyay dagaallo ka socda qaybo ka mid ah Puntland iyo colaadaha dhex mara beelaha, taasoo keentay barakac iyo xaalad nololeed oo adag.

Warbixinta OCHA ayaa sidoo kale sheegtay in 70,000 oo qof oo kale ay barakaceen, kuwaasoo ka yimid deegaanno ay ka mid yihiin Bari iyo Qandala, halkaas oo colaadaha iyo hawlgallada militari ay saameyn ku yeesheen dadka rayidka ah.

OCHA ayaa ku baaqday in la kordhiyo taageerada gargaarka bini’aadantinimo ee Puntland, iyadoo loo baahanyahay in la fududeeyo gaarsiinta gargaar caafimaad, cunto, iyo biyo si loo yareeyo saameynta ay ku leedahay bulshada Soomaaliyeed ee ku nool gobollada abaaraha iyo dagaallada saameeyay.