Garoowe, 10 Oktoobar 2025 (Dawan) — Wasaaradda Xanaanada Xoolaha iyo Horumarinta Daaqa ee Puntland ayaa ku dhawaaqday Amar lagu joojinayo dhoofinta xoolaha da’doodu ka yar tahay hal sano, kadib markii ay soo kordheen walaacyo la xiriira caafimaadka xoolaha ee la dhoofinayo ka dib warqad ka soo baxday xafiiskooda 9 October 2025. Wareegto kasoo baxday xafiiska Wasaradda, ayaa lagu amray dhammaan hay’adaha ay khuseeya oo ay ka mid yihiin maamulka dekedda Boosaaso, iyo laamaha caafimaadka xoolaha in si degdeg ah loo joojiyo dhoofinta xoolaha yaryar. “Wasaaraddu waxay aragtay dhibaatooyin soo noqnoqday oo ka dhashay dhoofinta xoolaha yaryar, taasoo keentay dhimasho badan iyo hoos u dhac tayada xoolaha oo keentay in dib loo soo celiyo,” ayaa lagu yiri bayaanka. “laga bilaabo maanta oo ay taariikhdu tahay 9 October 2025 lama dhoofin karo xoolo jira hal sano jira ama ka yar.” Wasaaraddu waxay sheegtay in go’aankani uu waafaqsan yahay Sharciga xoolaha Puntland oo dhigaya in dhammaan xoolaha la dhoofinayo ay maraan baaritaan caafimaad iyo shuruudo la jaanqaadaya heerarka caalamiga ah ee daryeelka xoolaha. Marada kale ee Wareegtada ku jiray waxaa ka mid ahaa : 1. In Dekedaha, garoomada iyo goobha kale aan laga dhoofin karin xoolo aan marin habraacyo caafimaadka xoolaha. 2. In aan xoolo ka yar hal sano ama hal sano jira aan puntland laga dhoofin karin. 3. Goobaha lagu baaro xoolaha ka hor inta aan la dhoofin in aysan ogolaanin in xeryahooda la keeno xoolo ka yar hal sano. Wasaaradda ayaa hay’adaha iyo ganacsatada xoolaha dhoofiya ka codsatay inay si buuxda u dhaqan galiyaan shircigaan cusub oo ay soo saareen. Ciddi diida aqbalaada codsigaan ee ku shaqeyn waysa amarka waxa ay sheegeen in talaabo sharci ah laga qaadi doono. Ururka Caalamiga ah ee Caafimaadka Xoolaha ayaa ka dhiga in xoolaha ka yar halka sano ay u nugul yihiin cudurado dhimasho inta ay ku jiraan safarka.
Maqaalka waa la soo dejinayaa...
