Puntland oo mamnuucday kaamamka aan qorsheysneyn

Soomaaliya, 5 Febraayo 2026 (Dawan) – Dowlad-goboleedka Puntland ayaa mamnuucay samaynta kaamam barakac oo cusub oo aan qorsheysnayn, iyadoo amartay in la burburiyo kaamamka sida sharci-darrada ah u samaysmay, si loo fududeeyo gaarsiinta gargaarka bini’aadannimo xilli ay abaartu sii xoogaysanayso.

Go’aankan ayaa lagu ansixiyay shirka Golaha Wasiirrada Puntland oo uu shir-guddoominayay Madaxweynaha Puntland, Siciid Cabdullaahi Deni, Khamiistii maanta.

Maamulka ayaa sheegay in halkii laga abuuri lahaa kaamam cusub, gargaarka bini’aadannimo si toos ah loogu geyn doono barakacayaasha goobaha ay hadda degan yihiin.

“Waxaa la joojiyay samaynta kaamamka barakacayaasha ee aan qorsheysnayn, waxaana la farayaa hay’adaha ay khusayso in la burburiyo kuwa si khaldan u samaysmay, iyadoo gargaarkana lagu gaarsiinayo dadka goobaha ay ku sugan yihiin,” ayaa lagu yiri war qoraal ah oo ka soo baxay Madaxtooyada Puntland.

Go’aankan ayaa yimid xilli hay’adaha bini’aadannimada ay ka digayaan in in ka badan 200,000 oo qoys oo ku nool Puntland inay wajahayaan xaalad adag oo isugu jirta abaar daba-dheeraatay iyo saameynta colaadaha, taasoo keentay in xoolihii dhintaan isla markaana daaqii gabaabsi noqdo.

Si loo yareeyo culayska dhaqaale, Puntland ayaa ku dhawaaqday cashuur-dhaaf soconaya muddo saddex bilood ah oo lagu sameeyay quudka xoolaha iyo galleyda la soo dejiyo. Sidoo kale, maamulka ayaa sheegay in biyaha laga helo ceelasha la gaarsiin doono dadweynaha lacag la’aan, iyadoo maamulki mas’uul ka noqonayo kharashaadka ceelasha, isla markaana booyadaha biyaha loogu baaqay inay dhimaan qiimaha ay ku iibiyaan biyaha.

Maamulka Puntland ayaa horay u sheegay in in ka badan hal milyan oo qof ay haatan u baahan yihiin gargaar bini’aadannimo guud ahaan deegaannada Puntland.

Golaha Wasiirrada Puntland ayaa ugu dambeyn ugu baaqay jaaliyadda Soomaaliyeed ee dibadda iyo ganacsatada gudaha inay door firfircoon ka qaataan gurmadka degdegga ah ee wax looga qabanayo saameynta abaarta.