Soomaaliya, 28 Sebteembar 2025 – Raysal Wasaaraha Soomaaliya Hamza Abdi Barre ayaa Axaddii sheegay in Afka Carabiga uu cadaadis xooggan kalu kulmayo Soomaaliya iyo guud ahaan dunida Carabta, isaga oo ka digay in luqadaha shisheeye ay ku xoogeystaan waxbarashada, maamulka iyo nolosha bulshada.
“Waxaan markhaati ka nahay hoos u dhac ku yimid dadaalladii lagu casriyeeyay afka, taasoo albaab u furtay in luqadaha shisheeye ay ku sii xoogaystaan waxbarashada, maamulka iyo adeegyadii rasmiga ahaa,” ayuu yiri Hamza.
Hadalkan ayuu ka sheegay munaasabadda lagu daahfurayay Barnaamijka Xoojinta Afka Carabiga ee Soomaaliya oo ka dhacay Muqdisho, barnaamijkii ugu horreeyay ee noociisa ah sanadihii ugu dambeeyay. Munaasabadda ayaa isu keentay mas’uuliyiin Soomaaliyeed, iyo wakiillo ka socday Jaamacadda Carabta si ay uga wada hadlaan sidii Afka Carabiga loogu xoojin lahaa dugsiyada, jaamacadaha iyo hay’adaha dowladda.
Hamza ayaa sheegay in Afka Carabiga uu laf-dhabar u yahay dhaqanka iyo aqoonsiga diineed ee Soomaaliya, balse qiray caqabadda ku jirta isku dheellitirka isaga iyo Af-Soomaaliga oo ah luqadda rasmiga ah ee dalka.
“Afka Carabigu ma aha af shisheeye Soomaaliya, balse waa qayb ka mid ah ruuxa iyo dhaqanka bulshada Soomaaliyeed,” ayuu yiri, isaga oo ku baaqay in la xoojiyo casriyeynta afka si looga hortago in dhinac la iska dhigo .
Raysal Wasaaruhu wuxuu intaas ku daray in dowladdiisu ay qaadan doonto talooyinka kasoo baxa barnaamijka, isla markaana lagu dari doono siyaasadaha waxbarashada iyo maamulka. Sidoo kale wuxuu amaanay kaalinta Jaamacadda Carabta, isaga oo xusay shaqada wakiilkeeda Muqdisho, Cabdullaahi Al-Otaibi.