Rwanda oo xiriirka u jartay dalka Belgium

By Sayyid Omar

Belgium iyo Rwanda ayaa ku dhawaaqay in ay iska saareen diblomaasiyiintooda, iyadoo xiriirkoodu sii xumaanayo sababo la xiriira eedeymaha la xiriira doorkooda colaadda bariga Jamhuuriyadda Dimuqraadiga ah ee Congo.

Rwanda ayaa sheegtay inay jarayso xiriirka diblomaasiyadeed ee Belgium, ayna siisay diblomaasiyiinta Belgium 48 saacadood in ay uga baxaan Rwanda, iyadoo Brussels ku eedeysay in ay hoggaaminaysay baaqyada loogu yeerayo dalalka Yurub inay cunaqabateyn ku soo rogaan Rwanda, sababo la xiriira taageerada ay siiso M23, oo ah koox fallaago ah, saldhigna u ah qalalaasaha ka taagan Jamhuuriyadda Dimuqraadiga ah ee Congo.

"Belgium si cad ayay uga qeyb qaadatay colaadda gobolka, waxayna si joogto ah ugu dhaqaaqaysaa olole ka dhan ah Rwanda, iyadoo adeegsaneysa been abuur iyo marin-habaabin, si ay u hesho aragti cadaawad ah oo aan sal lahayn oo ka dhan ah Rwanda, taas oo qeyb ka ah isku dayga lagu carqaladeynayo Rwanda iyo guud ahaan gobolka." ayaa lagu yiri bayaan ka soo baxay Wasaaradda Arrimaha Dibadda Rwanda.

Dhanka kale, Ra’iisul wasaare ku xigeenka ahna wasiirka arrimaha dibadda iyo iskaashiga horumarinta Belgium Maxime Prevot oo ka jawaabaya tallaabooyinka Rwanda ayaa bartiisa X (Twitter) ku soo qoray, “Belgium waxay ka xuntahay go'aanka Rwanda ay ku jartay xiriirka diblumaasiyadeed ee Belgium.”

Bishii Febraayo ee sanadkan, Golaha Ammaanka ee Qaramada Midoobay ayaa dalbaday in kooxda M23 joojiso dagaalka iyo in Rwanda ay ciidamadeeda kala baxdo Jamhuuriyadda Dimuqraadiga ah ee Congo.

Khilaafka diblomaasiyadeed ee Rwanda iyo Belgium ayaa ku soo aaday maalin kahor inta aysan dowladda Congo iyo fallaagada M23 u fariisan wada-hadallo nabadeed. Hase yeeshee, fallaagada ayaa galabnimadii Isniinta ku dhawaaqay in aysan mar dambe ka qeyb qaadan doonin, iyagoo eedeeyay hay’ado caalami ah oo aan la magacaabin inay wiiqayaan dadaallada nabadda.