Soomaaliya, 16 Oktoobar 2025 — Saddex ka mid ah xisbiyada siyaasadeed ee ka mid ah kuwa ugu saameynta badan Soomaaliya ee Samadoon, Dhulka Hooyo, iyo Xaqsoor — ayaa si rasmi ah uga dhawaaqay Arbacadii inay ka baxeen wadahadalladii doorasho ee ay kula jireen Dowladda Federaalka Soomaaliya, arrin ay falanqeeyayaashu ku tilmaameen guul-darro weyn oo ku wajahan doorashooyinka golayaasha deegaanka ee Benadir ee soo socda.
Xisbiyadan oo dhammaantood ku jira liiska 61-ka xisbi ee sida rasmiga ah u aqoonsan yahay guddiga doorashoooyinka dalka , ayaa ku dhawaaqay in ay gebi ahaanba ka baxayaan wadahadallo socday muddo laba bilood ah oo ay la lahaayeen dowladda federaalka. Wadahadalladan ayaa loogu talagalay in lagu xalliyo arrimaha nidaamka iyo qaab-dhismeedka ee diiwaangelinta codbixiyayaasha iyo hufnaanta doorashada gobolka Benadir.
Saddexda xisbi ayaa dowladda ku eedeeyay inay diiday in la sameeyo kormeer farsamo oo madax-bannaan oo ku saabsan nidaamka diiwaangelinta codbixiyayaasha, iyaga oo sheegay in go’aankaasi uu wiiqayo kalsoonida shacabka ee hufnaanta geeddi-socodka doorashada. Waxay ku tilmaameen bixitaanka wadahadallada mid “lagu muujinayo mudaaharaad ka dhan ah hufnaanta iyo xakamaynta kaliya ee hay’adaha maamulayaasha doorashada.”
“Waxaan uga digeynaa xukuumadda Soomaaliyeed iney qabato doorasho uu hal xisbi siyaasadeed sida shaati u toshay, taas oo horseedi karta khalalaase iyo hubanti la'aan siysaasadeed, ugana sii dari karta xaaladda cakiran ee dalkan.,” ayaa lagu yiri bayaanka.
Bixitaanka xisbiyadan ayaa ku soo beegmaya xilli siyaasadeed xasaasi ah. Qaar ka mid ah madaxda mucaaradka, oo ay ku jiraan madaxweynayaal iyo ra’iisul wasaareyaal hore, ayaa sidoo kale muujiyay shaki ku saabsan kalsoonida doorashada soo socota, taasoo sii xoojisay xiisadda u dhaxaysa dowladda iyo kooxaha siyaasadeed ee mucaaradka.
