Soomaaliya – 5 Janaayo 2025 (Dawan)- Hay’adda Tadamun Social Society ayaa axaddii si rasmi ah uga daahfurtay magaalada Dhahar ee gobolka Sanaag wajiga 4aad ee mashruuca gargaarka abaaraha, kaas oo ay taageerto Xarunta Gargaarka iyo Arrimaha Banii’aadantinimo ee Boqor Salmaan.
Gargaarkan ayaa loogu talagalay in lagu taageero 4,410 qoys oo ku nool Sanaag iyo Haylaan, iyadoo 510 qoys oo ka mid ah ay ku nool yihiin degmada Dhahar. Raashinka la qaybiyey ayaa ka kooban bur, bariis, sonkor, pasta, iyo saliid, waxaana si wadajir ah loogu qaybiyey dadka danyarta ah ee saameynta abaarta ay gaartay.
Kulanka daahfurka, waxaa ka soo qayb galay wasiiro, xildhibaano, maamulka Haylaan iyo degmada Dhahar, iyo xubno ka socday ururada bulshada. Wasirka Gargaarka iyo Maareynta Masiibooyinka Puntland, Ubax Cabdirashiid, ayaa si rasmi ah u furay mashruuca, iyadoo sheegtay in Puntland ay kaashaneyso hay’adda Tadamun si wax looga qabto baahiyaha dadka nugul.
