Qatar, 23 Janaayo 2026 ( Dawan)— Wasiirka Gaashaandhigga Jamhuuriyadda Federaalka Soomaaliya, Axmed Macallin Fiqi, ayaa Khamiistii ka qeybgalay munaasabad qalin-jabin ah oo lagu soo xirayay tababar ay dalka Qatar ku qaadanayeen saraakiil Soomaaliyeed, xilli ay Dowladda Federaalka xoojinayso dhismaha iyo tayeynta Ciidanka Xoogga Dalka.
Munaasabadda, oo ka dhacday Kulliyadda Milateriga Axmed bin Maxamed, ayaa waxaa ku qalin-jabiyay 534 sarkaal oo ka kala socday dalalka Qatar, Kuwait, Urdun, Ruwanda iyo Soomaaliya. Xafladda ayaa waxaa si rasmi ah u soo xiray Amiirka Dowladda Qatar, Sheekh Tamiim bin Xamad Aal Thaani, oo billado guddoonsiiyay saraakiishii ku guuleysatay kaalmaha hore.
"Wasiirka Gaashaandhigga ayaa xusay in xirfadaha iyo aqoonta ay heleen saraakiishan qalin-jabisay ay si weyn kor ugu qaadi doonaan awoodda iyo kartida Ciidanka Xoogga Dalka Soomaaliyeed." ayaa lagu yiri bayaan ka soo baxay wasaradda Gaashaandhigga munaasabadda ka dib.
