Sidee Baarlamaanka Soomaaliya u qorsheeyay jadwalka wax-ka-beddelka Dastuurka?

Muqdisho, 27 Janaayo 2026 (Dawan)– Baarlamaanka Federaalka Soomaaliya ayaa dejiyay jadwal faahfaahsan oo lagu eegayo wax ka beddelka Dastuurka Ku-meel-gaarka ah, xilli ay sii kordhayaan khilaafaadka siyaasadeed ee u dhexeeya dowladda federaalka iyo siyaasiyiinta mucaaradka, sida uu muujinayo dukumeenti rasmi ah oo ay aragtay warbaahinta Dawan.

Sida ku cad jadwalka, hannaanka dib-u-eegista dastuurka ayaa si rasmi ah u bilaabanaya 28-ka Janaayo, iyadoo la diyaarinayo soo-jeedimo wax ka beddel ah, lana fulinayo shaqo farsamo iyo la-tashiyo gudaha ah oo u dhexeeya hay’adaha ku lugta leh geeddi-socodka.

Marxaladda xigta, oo socon doonta dhammaadka Janaayo ilaa Febraayo, ayaa la filayaa in hay’adaha muhiimka ah ee dowladda ay dib u eegaan soo-jeedimaha. Inta u dhexeysa 31-ka Janaayo iyo 5-ta Febraayo, waxaa la qorsheeyay la-tashiyo rasmi ah oo u dhexeeya dowladda federaalka iyo dowlad-goboleedyada xubnaha ka ah Federaalka, si aragti mideysan looga yeesho wax ka beddelka la soo jeediyay.

Baarlamaanka Federaalka ayaa la filayaa inuu dood rasmi ah ka yeesho arrimaha dastuurka inta u dhexeysa 7-da ilaa 12-ka Febraayo, iyadoo markaasi la horgeyn doono soo-jeedimaha wax ka beddelka ee khuseeya Cutubyada Shanaad ilaa Sagaalaad ee Dastuurka Ku-meel-gaarka ah.

Sidoo kale, jadwalku wuxuu tilmaamayaa in Madaxweynaha Jamhuuriyadda iyo Golaha Wasiirrada ay tixgelin doonaan soo-jeedimaha intii u dhexeysa 14-ka ilaa 19-ka Febraayo, halka dib-u-eegis sharciyeed oo uu sameyn doono Xeer Ilaaliyaha Guud la qorsheeyay inay dhacdo 21-ka ilaa 26-ka Febraayo.

Hannaanka dib-u-eegista dastuurka ayaa la filayaa inuu soo gaba-gaboobo 3-da Maarso, markaas oo la diyaarin doono nuqul mideysan oo ka tarjumaya wax ka beddelada lagu sameeyay Cutubyada Shanaad ilaa Sagaalaad, iyadoo lagu saleeynayo doodaha labada Aqal ee Baarlamaanka iyo talooyinka farsamo ee khubarada dastuuriga ah.

Tallaabadan ayaa ku soo aadaysa xilli dowladda federaalka ay diyaarinayso in la billaabo wadahadal qaran oo u dhexeeya dowladda iyo kooxaha mucaaradka ee Golaha Mustaqbalka Soomaaliyeed, kaas oo la filayo inuu furmo 1-da Febraayo. Kooxaha mucaaradka ayaa hore u dalbaday in la hakiyo wax ka beddel kasta oo lagu sameynayo Dastuurka Ku-meel-gaarka ah ee 2012, si wadahadalku u noqdo mid miro dhal ah.

Hannaanka dib-u-eegista dastuurka iyo geeddi-socodkan ayaa weli ah tiir muhiim u ah dadaallada dhismaha dowladnimada Soomaaliya, waxaana la filayaa inuu saameyn ballaaran ku yeesho mustaqbalka nidaamka federaalka, awood-qaybsiga, iyo jihada siyaasadeed ee dalka