Agaasimaha Hay’adda Sirdoonka iyo Amniga Qaranka Soomaaliya (NISA), Cabdullaahi Maxamed Cali, iyo Agaasimaha Guud ee Hay’adda Sirdoonka iyo Amniga Qaranka Itoobiya (NISS), Redwan Xuseen, ayaa kulan ku yeeshay magaalada Addis Ababa. Kulanka ayaa looga hadlay iskaashi laba geesood ah iyo caqabadaha amniga ee gobolka.
Redwan Xuseen ayaa bartiisa X kusoo qoray: “Waxaan soo dhoweeyay Agaasimaha NISA, Cabdullaahi Maxamed Cali. Waxaan ka wada hadalnay caqabadaha wadajirka ah, fursadaha, iyo jihada loo socdo. Anagoo ku tiirsan Heshiiska Ankara, waxaan ku heshiinnay inaan hore u soconno oo aan ka ilaalinno dadaalladeenna wax kasta oo caqabad ku noqon kara.”
Kulanka ayaa xoogga lagu saaray xoojinta iskaashiga sirdoonka labada dal iyo hirgelinta Heshiiska Ankara, kaas oo ujeedkiisu yahay in la adkeeyo nabadda iyo wada shaqaynta labada dowladood. Si kastaba ha ahaatee, lama soo hadal qaadin xiisadda taagan ee ku saabsan weerarka lagu eedeeyay ciidamada Itoobiya ee Doolow.
