Somaliland oo ku dhawaaqday inay bilaawday olole lagu tallaalayo 1182 carruur ah.

Soomaaliya, 2 November 2025 — Wasaaradda Horumarinta Caafimaadka Somaliland ayaa Sabtidii ku dhawaaqday ololaha talaalka carruurta, kaas oo lagu tallalayo dhallaanka da’doodu u dhaxeyso hal sano ilaa shan sano, waxaana laga fulin doonaa dhammaan deegaanada Somaliland.

Ololahan ayaa ah mid looga hortaggayo cudurrada faafa oo ay ka mid yihiin dabaysha, jadeecada, qandhada qaboobaha, qaaxada iyo shubanka. Mas’uuliyiinta caafimaadka ayaa sheegay in ololaha lagu gaari doono 1182 carruur ah kuwaas oo da’doodu u dhaxeyso hal sano ilaa shan sano.

Wasiirka Caafimaadka Somaliland, Xuseen Bashiir Xirsi, oo furitaanka ololaha ka hadlay ayaa sheegay in wasaaraddu ka go’an tahay gaarsiinta adeegyada caafimaadka carruurta Somaliland meel kasta oo ay ku nool yihiin.

“Wasaaraddu iyadoo waajibaadkeeda fulinaysa waxa ka go’an carruurta Somaliland meel kasta ay joogaan in adeega caafimaadka la gaarsiiyo,” ayuu yiri Wasiirku, isaga oo waalidiinta ugu baaqay inay carruurtooda keenaan goobaha talaalka.

Ololahan ayaa ay iska kaashanayaan Wasaaradda Caafimaadka, WHO iyo UNICEF, waxaana uu qayb ka yahay dadaallada lagu yareynayo cudurrada laga hortagi karo iyo dhimashada dhallaanka.

Warbixinadii ugu dambeeyey ee hay’adaha caalamiga ah ayaa muujinaya in heerka tallaalka carruurta ee Soomaaliya uu hoos uga dhacay 50% sanadihii la soo dhaafay. UNICEF waxay sheegtay in qiyaastii 1.5 milyan oo carruur ah oo ka yar shan sano ay yihiin carruur aan weligood helin hal tallaal (zero-dose), taas oo muujinaysa baahida degdegga ah ee kor loogu qaadayo ololayaasha tallaalka.