Somaliland oo qorsheynaysa inay ku biirto Heshiiska Abraham

Switzerland, 24 Jannaayo 2026 (Dawan)– Madaxweynaha Somaliland, Cabdiraxmaan Maxamed Cabdillaahi (Cirro), ayaa Khamiistii sheegay in Somaliland ay qorsheyneyso inay ku biirto Heshiiska Abraham (Abraham Accords), oo ah hindise uu hoggaaminayo Maraykanku, soo bilaawday xilligii hore ee madaxweynaha Mareykanka Donald Trump.

Isagoo ka hadlayay munaasabad doceed ka dhacday Madasha Dhaqaalaha Adduunka ee Davos, Cirro ayaa xusay in siyaasadda Somaliland ay ku dhisan tahay xasillooni, nabad iyo iskaashi goboleed. Wuxuu sheegay in Heshiiska Abraham uu salka ku hayo wada-hadal iyo is-faham, isla markaana Somaliland ay taageersan tahay dadaalladaas.

““Hindisahan cusub ee uu hoggaaminayo Madaxweyne Trump, wuxuu ku dhisanyahay mabda’a ah in laga shaqeeyo nabadda. Waynu dhowreynaa dadaalkan, waxaanan taageersanahay wadahadalka, is-dhexgalka bulshada, iyo iskaashiga gobolka,”,” ayuu yiri Cirro.

Madaxweynaha Somaliland ayaa sidoo kale carrabka ku adkeeyay in Israa’iil ay si rasmi ah u aqoonsatay Somaliland, taas oo, sida uu sheegay, sii xoojinaysa doonista Hargeysa ee ah inay qayb ka noqoto geeddi-socodka Heshiiska Abraham. ““Israaiil way aqoonsatay Somaliland. Sidaa darteed, waa inaan qayb ka noqonaa geeddi-socodka nabadda ee uu bilaabay Madaxweyne Trump, kaas oo ah heshiiska Abraham Accords,” ayuu hadalkiisa ku daray.

Heshiiska Abraham, oo la saxiixay sannadkii 2020, ayaa ujeeddadiisu ahayd caadiyeynta xiriirka u dhexeeya Israa’iil iyo dalal Carbeed, waxaana markii hore ku biiray Imaaraadka Carabta iyo Baxreyn. Inkasta oo uu diiradda saarayo Bariga Dhexe, haddana hindisahan ayaa hadda loo arkaa mid fursad u noqon kara iskaashi ballaaran oo goboleed, oo ay ku jiraan dalal ka baxsan Carabta.