Soomaaliya iyo Mareykanka oo ka wada hadlay kordhinta taageerada gargaarka abaaraha

Muqdisho, 11 December 2025 – (Dawan)- Guddoomiyaha Hay’adda Maareynta Musiibooyinka Soomaaliya (SoDMA), Maxamuud Macallin Cabdulle, ayaa Arbacadii kulan la qaatay Safiirka Maraykanka ee Soomaaliya, Richard H. Riley, iyagoo ka wada hadlay sidii Maraykanku uu mar kale uga qeyb qaadan lahaa xaaladda bini’aadantinimo ee Soomaaliya, gaar ahaan abaaraha saameeyay dalka.

Kulanka ayaa ka dhacay safaaradda Maraykanka ee Muqdisho, waxayna labada mas’uul xoogga saareen sidii deeq-bixiyaha ugu weyn ee gargaarka bini’aadantinimo, Maraykanka, uu mar kale u kordhin lahaa taageerada uu siinayo Soomaaliya.

Sanadkan, Dowladda Mareykanka waxay gargaarka Soomaaliya ku bixiyay wax ka yar 32 milyan oo doolar, inkasta oo ay mar ahaan jirtay deeq-bixiyaha ugu weyn ee Soomaaliya ee dhinaca gargaarka bini’aadantinimo. SoDMA ayaa hore u sheegtay in bakhaarada hay’adda ee lagu kaydiyo cuntada inay faaruq yihiin, isla markaana ku dhawaad 5 milyan oo Soomaali ah ay u baahan yihiin gargaar degdeg ah. Hay’adda ayaa codsatay sanadkan 1.5 bilyan oo doolar si wax looga qabto abaaraha, balse waxaa la helay oo kaliya ku dhawaad 280 milyan oo doolar.

Taageerada Mareykanka ayaa Soomaaliya gaartay in ka badan 7 bilyan oo doolar, iyadoo sanadkii 2022 uu bixiyay 1.3 bilyan oo doolar. Si kastaba ha ahaatee, markii Donald Trump mar kale uu xilka madaxtinimada Mareykanka qabtay, waxa uu joojiyay gargaarkii uu dalkiisa siin jiray dunida.