Soomaaliya iyo Pakistan oo kala saxiixanaya heshiis la xiriira ka hortagga Masiibooyinka

"Waxaan dadaal xooggan ugu jirnaa sidii aan Soomaaliya uga saari lahayn xaaladda adag ee ay ku jirto. Si taas loo hirgeliyo, waxaan ku howlan nahay saxiixa heshiis is-afgarad oo wada-shaqeyn ah oo aan la yeelaneyno Hay’adda NDMA ee Pakistan. Heshiiskan wuxuu noo oggolaan doonaa inaan ka faa’iidaysanno khibraddooda, gaar ahaan dhinaca digniinaha degdegga ah ee cimilada, si aan uga hortagno masiibooyinka ka hor inta aysan dhicin" ayuu Dawan u sheegay Maxamuud Macallin.

Labada hay’adood ayaa adkeeyay in iskaashigan uu noqon doono mid joogto ah, kaas oo diiradda saaraya xoojinta u-diyaargarowga iyo jawaabta degdegga ah ee masiibooyinka, si kor loogu qaado adkaysiga iyo badbaadada bulshooyinka dalka. Intii uu ku jiray safarka, Guddoomiyaha SoDMA ayaa booqday xarumaha NDMA, isagoo indha-indheeyay nidaamyada horumarsan ee lagu maareeyo fatahaadaha, dhulgariirrada iyo masiibooyinka la xiriira isbeddelka cimilada.

Heshiiska Is-afgaradku wuxuu dhisi doonaa saldhig iskaashi farsamo, is-weydaarsi aqoon, iyo dhisidda awoodaha hay’adaha, taas oo Soomaaliya ka caawin doonta horumarinta nidaamyada digniinta hore iyo jawaabta degdegga ah. Tallaabadan ayaa imaaneysa xilli Soomaaliya ay la tacaaleyso masiibooyin soo noqnoqda oo ay ka mid yihiin abaaro iyo fatahaado, taasoo muujineysa muhiimadda qorshayaal wax ku ool ah oo lagu yareeyo khataraha masiibooyinka.