Soomaaliya iyo Ruushka oo kala saxiixday heshiis iskaashi caafimaad

Geneva, Switzerland, 4 Febraayo 2026 (Dawan) — Soomaaliya iyo Ruushka ayaa kala saxiixday heshiis iskaashi caafimaad oo ujeeddadiisu tahay xoojinta wada-shaqeynta dhinaca caafimaadka, sida ay mas’uuliyiintu ku dhawaaqeen Talaadadi.

Wasiirka Caafimaadka iyo Adeegga Bulshada ee Soomaaliya, Cali Xaaji Aadan Abubakar, iyo Xoghayaha Dowladda ahna Ku-xigeenka Wasiirka Caafimaadka ee Ruushka, Oleg Salagay, ayaa kala saxiixday heshiiskan Is-afgarad ah (MoU) intii uu socday kulan laba geesood ah oo ka dhacay xafiiska joogtada Ruushka ee Qaramada Midoobay ee magaalada Geneva.

Sida ku cad war-saxaafadeed ka soo baxay labada dhinac, heshiiskan ayaa lagu ballaarinayaa iskaashiga ku aaddan: Horumarinta nidaamka daryeelka caafimaadka

Nidaaminta iyo socodsiinta daawooyinka

Tababarka iyo horumarinta xirfadaha shaqaalaha caafimaadka Soomaaliyeed

Tallaallada iyo iskaashiga hay’adaha cilmi-baarista

Heshiisku waxa kale oo uu daboolayaa caafimaadka hooyada iyo dhallaanka, ka hortagga iyo daaweynta cudurrada faafa iyo kuwa aan faafin, tignoolajiyada caafimaadka ee dhijitaalka ah, caafimaadka nukliyeerka, iyo dhiirrigelinta dalxiiska caafimaadka, sida ay sheegtay Wasaaradda Caafimaadka Soomaaliya.

Labada mas’uul ayaa sheegay in heshiiskani uu gacan ka geysan doono hagaajinta tayada adeegyada caafimaadka ee Soomaaliya iyo xoojinta awoodda hay’adaha caafimaadka, iyagoo carrabka ku adkeeyay in hirgelinta dhab ah ay fure u tahay gaarista natiijooyin muuqda.

Soomaaliya iyo Ruushka ayaa leh xiriir taariikhi ah oo soo billowday xilligii Midowgii Soofiyeeti, iyadoo Moscow ay sannadihii u dambeeyay dadaal ugu jirtay ballaarinta iskaashiga ay la leedahay waddamada Afrika, gaar ahaan dhinacyada caafimaadka, waxbarashada, iyo farsamada.