Istaambul (Dawan)- Madaxweynayaasha Soomaaliya, Xasan Sheekh Maxamuud, iyo Turkiga, Recep Tayyip Erdoğan, ayaa si wadajir ah u shaaciyay in hawlaha qodista shidaalka iyo gaaska ee badda Soomaaliya la bilaabi doono sanadka 2026, kaddib kulan heer sare ah oo uu xigay shir jaraa’id ay ku yeesheen magaalada Istaambul.
Kulanka labada Madaxweyne ayaa diiradda lagu saaray xoojinta xiriirka istaraatiijiyadeed ee Soomaaliya iyo Turkiga, gaar ahaan dhinacyada iskaashiga dhaqaale, horumarinta kheyraadka dabiiciga ah, iyo ilaalinta madaxbannaanida iyo midnimada dhuleed ee Soomaaliya.
Madaxweyne Xasan Sheekh Maxamuud ayaa sheegay in horumar la taaban karo laga gaaray baaritaannada shidaalka iyo gaaska ee badda Soomaaliya, isagoo tilmaamay in natiijooyinka hordhaca ah ee ka soo baxay qiimeynno farsamo iyo cilmiyeed ay suurto-gelinayaan in la guda galo marxaladda xigta ee hawlgalka qodista.
“Helitaanka shidaalka iyo gaaska waa fursad istaraatiiji ah oo door weyn ka qaadan karta soo kabashada dhaqaalaha Soomaaliya,” ayuu yiri Madaxweyne Xasan Sheekh, isagoo intaa ku daray in dowladdu ay ka go’an tahay in kheyraadkaas loo maamulo si masuuliyad leh, lana hubiyo in danta shacabka Soomaaliyeed ay noqoto mudnaanta koowaad.
