Soomaaliya, 8 Oktoobar 2025 – Dowladda Federaalka Soomaaliya ayaa si rasmi ah u beenisay warar dhawaan ku faafay warbaahinta, kuwaas oo sheegaya in Soomaaliya iyo Sweden ay galeen “heshiis qarsoodi ah” oo ku saabsan gargaarka horumarineed iyo aqbalaadda muwaadiniinta Soomaaliyeed ee la soo celinayo.
Warbixintan, oo horay u baahisay idaacadda qaranka ee Sweden, Ekot, ayaa sheegtay in lacagaha gargaarka horumarineed ee Sweden loo wareejiyey mashaariic la xiriira xafiiska Ra’iisul Wasaaraha Soomaaliya si loo xoojiyo saameynta siyaasadeed ee xafiiska.
Xafiiska Ra’iisul Wasaaraha ayaa maanta ku sheegay in eedeymahan ay yihiin kuwo been abuur ah, marin-habaab ah, oo aan sal iyo raad toona lahayn, isla markaana aysan jirin wax heshiis qarsoodi ah ama shuruudeysan oo Soomaaliya ay la gashay waddan kale oo ku saabsan soo celinta muwaadiniinteeda ama qaybinta gargaarka horumarineed.
“Eedeymahan waa kuwo been abuur ah, marin-habaab ah, isla markaana aan sal iyo raad toona lahayn. Ma jirto heshiis qarsoodi ah ama shuruudeysan oo Soomaaliya ay la gashay waddan kale oo ku saabsan soo celinta muwaadiniinteeda ama qaybinta gargaarka horumarineed,” ayaa lagu yiri qoraalka rasmiga ah ee xafiiska Ra’iisul Wasaaraha.
Dowladda ayaa xustay in dhamaan gargaarka iyo mashaariicda horumarineed ee Soomaaliya loo maamulo si daahfuran, iyadoo la raacayo heerarka caalamiga ah ee Bangiga Adduunka, Qaramada Midoobay, iyo hannaanka xisaabaadka dowladda dhexe ee Soomaaliya.
