Muqdisho (Dawan)- Guddiga Qaran ee La-Dagaallanka Lacag-Dhaqidda iyo Maalgelinta Argagixisada ee Soomaaliya (NAMLC) ayaa ansixiyay liis cusub oo cunaqabateyn maaliyadeed lagu soo rogay xubno lagu tuhunsan yahay ku lug lahaanshaha maalgelinta kooxaha argagixisada, kaddib kulan ay shalay ku yeesheen magaalada Muqdisho.
Guddigu ma shaacin magacyada xubnaha liiska lagu daray iyo kooxaha ay ka tirsan yihiin, balse wuxuu sheegay in tallaabadan ay qeyb ka tahay dadaallada lagu adkeynayo dagaalka ka dhanka ah ilaha dhaqaale ee ay ka faa’iideystaan kooxaha Al-Shabaab iyo Daacish.
Kulankan oo ah mid si joogto ah u qabsooma bil kasta, ayaa waxaa shir-guddoominayay Wasiirka Maaliyadda Xukuumadda Federaalka Soomaaliya, Mudane Biixi Imaan Cige, oo ah Guddoomiyaha Guddiga NAMLC. Waxaana ka qeyb galay Wasiirka Dekedaha iyo Gaadiidka Badda, Cabdulqaadir Maxamed Nuur, Taliyayaasha Hay’adda Sirdoonka iyo Nabad-Sugidda Qaranka (iyo Booliska, iyo mas’uuliyiin kale oo ka tirsan hay’adaha dowladda.
