Soomaaliya oo daahfurtay qorshaha ka-jawaabista baahiyaha bani’aadannimo ee 2026

Muqdisho, Dawan –– Soomaaliya ayaa si rasmi ah u daah-furtay Qorshaha Ka-jawaabista Baahiyaha Bani’aadannimo ee 2026 (HNRP), kaas oo lagu hagayo gurmadka naf-badbaadinta iyo gaarsiinta gargaarka degdegga ah ee dadka ugu nugul.

Munaasabadda waxaa ka qeyb-galay Ra’iisul Wasaare Ku-xigeenka Labaad ee Xukuumadda Federaalka Soomaaliya, Mudane Jibriil Cabdirashiid Xaaji iyo Guddoomiyaha Hay’adda Maareynta Masiibooyinka Qaranka Soomaaliyeed (SoDMA), Maxamuud Macallin Cabdulle.

Guddoomiyaha SoDMA, Maxamuud Macallin Cabdulle, ayaa sheegay in Qorshaha HNRP uu yahay aalad muhiim ah oo loogu talagalay in lagu badbaadiyo nolosha dadka, laguna gaarsiiyo gargaar ku saleysan mabaadi’da bani’aadannimo. "Qorshaha HNRP 2026 waa tallaabo muhiim ah oo ku wajahan xal u helista baahiyaha bani’aadannimo ee dalka, waxaana naga go'an inaan hubinno in iskaashiga dowladda iyo bah-wadaagta caalamiga ah uu noqdo mid wax ku ool ah, si loo xoojiyo adkeysiga iyo la-qabsiga isbeddelka cimilada," ayuu yiri Guddoomiyaha.

Maxamuud Macalin ayaa sidoo kale carrabka ku adkeeyay in qorshuha u baahan yahay is-waafajin buuxda oo lala yeesho nidaamyada badbaadada bulshada iyo yareynta khataraha masiibooyinka. Waxaa uu xusay in HNRP 2026 uu sidoo kale ka tarjumayo dadaallada ay dowladdu ka taageereyso saaxiibada caalamiga ah, iyadoo loo marayo isku-duwidda gargaarka degdegga ah iyo ka-jawaabista xaaladaha bani’aadannimo ee ka dhashay abaaraha, colaadaha, barakaca, iyo saameynta isbeddelka cimilada.

Ra’iisul Wasaare Ku-xigeenka Labaad, Jibriil Cabdirashid, oo isna ka hadlay muhiimada qorshahan, ayaa baaq u diray bah-wadaagta caalamiga ah, hay’adaha Qaramada Midoobay, NGO-yada iyo deeq-bixiyeyaasha, isagoo ugu baaqay in ay xoojiyaan iskaashiga ay la leeyihiin Dowladda Federaalka Soomaaliya si loo hirgeliyo HNRP 2026.

Qorshahan ayaa si gaar ah loogu talagalay in lagu xoojiyo dadaallada Soomaaliya ee ku aaddan ka-jawaabista baahiyaha bani’aadannimo ee sannadkan, iyadoo laga dhaxlay qiimeyn dhab ah oo ku saabsan baahiyaha hadda taagan iyo sida ugu wanaagsan ee loogu adeegayo dadka Soomaaliyeed.