Nairobi (Dawan) – Safiirka Soomaaliya u fadhiya Kenya ayaa ku baaqay in la kordhiyo taageerada caalamiga ah si loo hirgeliyo qorshaha qaran ee wax ka qabashada abaaraha, isagoo ka digay in isbeddelka cimiladu uu sii xumeynayo barakaca iyo caqabadaha xuquuqda aadanaha, sida ay sheegtay Safaaradda Soomaaliya ee Nairobi.
Hadalkan ayaa sheegay intii lagu guda jiray madal lagu qabtay magaalada Nairobi oo looga hadlayay saameynta abaaraha iyo barakaca ka dhasha cimilada ee Soomaaliya, halkaas oo hay’adda Amnesty International ay ku soo bandhigtay warbixin cinwaankeedu yahay “Roob La’aan, Cunto La’aan, Xoolo La’aan"
Sida ay safaaraddu sheegtay, Danjire Jibriil Ibraahim Cabdulle ayaa sheegay in abaaraha iyo fatahaadaha aan loo arkin oo kaliya arrimo deegaan, balse ay sidoo kale yihiin caqabado la xiriira xuquuqda aadanaha.
Wuxuu xusay in Soomaaliya ay leedahay qorshe qaran oo cad oo wax looga qabanayo abaaraha, balse loo baahan yahay hirgelin ballaaran oo ku timaadda iskaashi isku duuban iyo taageero joogto ah oo ay hoggaaminayaan hay’adaha Soomaaliyeed iyo saaxiibada caalamiga ah.
