Soomaaliya oo dhagax-dhigtay dhismo cusub oo Machadka Cilmi-baarista Beeraha Qaranka ah

Soomaaliya, 16 Nofeembar 2025 — Ra’iisul Wasaaraha Soomaaliya, Xamse Cabdi Barre, ayaa maanta dhagax-dhigay Xarunta Qaranka ee Cilmi-baarista Beeraha (NARI), oo noqon doonta heer qaran oo si buuxda u diiradda saarta cilmi-baarista sayniska beeraha iyo horumarinta wax-soo-saarka dalka.

Mashruucan ayaa qayb ka ah qoondada Soomaaliya ee Barnaamijka Adkeysiga Nidaamka Cuntada (FSRP) ee Bariga iyo Koonfurta Afrika, oo uu maalgeliyo Bangiga Adduunka.

Bangiga Adduunka ayaa 31-kii May 2023, ansixiyay $150 milyan oo maalgelinta IDA ah oo loo qoondeeyay Soomaaliya, waxaana NARI ka mid yahay mashaariicda qaranka ee laga hirgelinayo deeqdan.

Dhismaha cusub, oo la filayo in lagu dhameeyo 12 bilood gudahood, waxa uu yeelan doonaa saddex dabaq (G+2), oo ka kooban 19 xafiis, siddeed shaybaar, laba qeyb-baraarugeed oo tababar ah, iyo kaabayaal cilmi-baariseed oo kale.

Ra’iisul Wasaare Barre ayaa sheegay in xaruntan cusubi yeelan doonto door muhiim ah oo wax ka beddela aqoonta beeraha ee dalka.

“Waxaan rajeynayaa in machadkani soo saari doono khubaro Soomaaliyeed oo door muuqda ka qaata kobcinta wax-soo-saarka beeraha,” ayuu yiri.

Wuxuu beeraha ku tilmaamay “laf-dhabarta dhaqaalaha dalka”, isaga oo xusay in cabsi caalami ah oo ku saabsan yaraanta cunnada ay kordhisay muhiimadda ay leedahay in Soomaaliya ay xoogga saarto ku tiirsanaato wax-soo-saarka gudaha.

“Dhulkeenna waa mid bacrin ah oo leh biyo ku filan, waxaynu nahay dal isku filan, lkn waxaan u bahannahy inaan xogga saarno arrinta beerah,” ayuu raaciyay, isaga oo ugu baaqay ganacsatada gudaha inay maalgashigooda u weeciyaan wax-soo-saarka cuntada ee waddanka.

Wasiirka Beeraha iyo Waraabka, Maxamed Cabdi Xayir “Maareeye”, ayaa sheegay in dib u dhiska awoodda cilmi-baarista qaranku uu yahay tallaabo lama huraan u ah soo celinta hay’adihii burburay.

“Soomaaliya mar waxay lahayd xarumo cilmi-baaris oo aad u waaweyn ka hor burburkii. Isbdelka Cimilada oo aad u jiro waxaa aad loogu baahanyahay laqabsigiisa oo Cilmi iyo Baaris leh,” ayuu yiri, isaga oo ku daray in xaruntani ay xoojin doonto awoodda dalka ee la-qabsiga isbeddellada cimilada.

Sida wasarada ay sheegtay Xarunta NARI ayaa qaban doonta cilmi-baaris ku saabsan dalagyada mudnaanta leh, xoolaha, khayraadka dabiiciga ah iyo la-qabsiga cimilada; waxay horumarin doontaa noocyo cusub oo dalag ah; waxay maamuli doontaa kaydka hidde-sidaha (germplasm); sidoo kale waxay isku xiri doontaa cilmi-baarista jaamacadaha iyo hay’adaha qaran.

Mas’uuliyiintu waxa ay sheegeen in mashruucan uu astaan u yahay dadaalka ay dowladda ku doonayso casriyeynta beeraha iyo yaraynta ku tiirsanaanta dalka ee cunnada la soo dejiyo.

Qaybaha

Qoraallo Cusub

Ra’iisul Wasaaraha Soomaaliya iyo safiirka Qatar oo ka wadahadlay ka jawaabista abaarta dalka

Warfaafinta Somaliland oo Shaqada Iska Casilay ka Dib Baajintii Xuska Buugga Xeer Ciise

Soomaaliya oo fartay hay’adaha caalamiga ah inay la jaanqaadaan qorshaha qaran ee caafimaadka

Soomaaliya oo dhagax-dhigtay dhismo cusub oo Machadka Cilmi-baarista Beeraha Qaranka ah

Ra’iisul Wasaaraha Soomaaliya iyo safiirka Qatar oo ka wadahadlay ka jawaabista abaarta dalka

Warfaafinta Somaliland oo Shaqada Iska Casilay ka Dib Baajintii Xuska Buugga Xeer Ciise

Soomaaliya oo fartay hay’adaha caalamiga ah inay la jaanqaadaan qorshaha qaran ee caafimaadka

DDS oo xiraysa goobaha Caafimaad ee aan ruqsadda lahayn

Maqaallo La Xidhiidha

Madaxweynaha Somaliland oo Joojiyey Munaasabadda Xeer-Ciise

Madaxweyne Cirro Oo Amray In Ciidamada Laga Saaro Borama

Somaliland oo Dowladda Soomaaliya Ku Eedeysay Hurinta Rabshadaha Ka Socda Boorama.