Soomaaliya oo dooneysa inay korontada la cusboonaysiin karo gaarsiiso 50%

Soomaaliya, 15 October 2025 — Wasiirka Tamarta iyo Kheyraadka Biyaha ee Soomaaliya, Cabdullaahi Bidhaan Warsame, ayaa sheegay in dowladda Soomaaliya ay qorsheyneyso in saddex sano gudahood ay koronto la cusboonaysiin karo gaarsiiso 50% bulshada Soomaaliyeed, si loo helo koronto nadiif ah oo la awoodi karo.

Isagoo ka hadlayey maanta Bandhigga Guuleystayaasha Soomaaliyeed, oo sanadkan diiradda lagu saarayo tamarta iyo hal-abuurka, ayuu Wasiir Warsame sheegay in 49% bulshada Soomaaliyeed aysan weli haysan koronto ama aysan haysan koronto tayo leh — taas oo aad uga hooseysa celceliska qaaradda Afrika ee ah 65%.

“Waxaan qorsheyneynaa inaan yareyno ku-tiirsanaanta shidaalka, annagoo doonayna inaan saddexda sano ee soo socota hoos ugu dhigno 50%, halka 50% kalena aan ka dhigno tamar qoraxeed, si aan shacabka u gaarsiino koronto nadiif ah oo jaban,” ayuu yiri wasiirku.

Wuxuu sheegay in 85% korontada Soomaaliya lagu dhaliyo shidaal (diesel), taas oo ka dhigaysa mid qaali ah isla markaana aan waara ahayn. Dowladda ayaa qorsheynaysa in ugu yaraan kala bar korontada dalka laga dhaliyo ilo cagaaran sida qorraxda iyo dabaysha.

Wasiir Warsame ayaa xusay in Soomaaliya ay weli ka mid tahay dalalka aan lahayn shabakad koronto qaran, taas oo uu sheegay inay laf-dhabar u tahay in koronto gaarto guud ahaan dalka wuxuu sheegay in heltanaka shirkadaas la qorsheenayo isagoo sheegay in shirkado gaar loo leeyahay ay hadda buuxinayaan kaalintii dowladda.

Wuxuu intaas ku daray in Magaalada Muqdisho ay tahay meesha ugu jaban ee korontada dalka, iyadoo celceliska qiimaha korontadu yahay 41 senti halkii kiilowaat . Si kastaba, wuxuu sheegay in sicirkaas uu weli ka sarreeyo kan magaalooyinka deriska ah sida Addis Ababa iyo Nairobi, loona baahan yahay in la helo qiime tartan u adkeysan kara.

“Waxaana rabnaa shacabka Soomaaliyeed — oo xoolahan iska leh — in ay ka faa’iidaan. Hooyada Soomaaliyeed ee isticmaasha hal laambad keliya, oo $20 bishii lagu qaado, waa in ay awooddo in isla lacagtaas ku isticmaasho laambad, talaagad, iyo qalab kale oo ilmaheeda u fiican,” ayuu yiri Wasiirku.

Wasiirka ayaa sidoo kale shaaciyay in in ka badan $200 milyan oo mashaariic tamareed ay hadda ka socdaan dalka, iyadoo qaar ay horey u socdaan halka kuwa kalena la filayo inay bilowdaan labada sano ee soo socota.