Soomaaliya oo ka mid noqotay Golaha Nabadda iyo Amniga ee Midowga Afrika

Soomaaliya, 11 Febraayo 2026 (Dawan)- Soomaaliya ayaa loo doortay inaay xubin ka noqoto Golaha Nabadda iyo Amniga (PSC) ee Midowga Afrika muddada 2026–2028, sidii ay ku dhawaaqday Wasaaradda Arrimaha Dibadda iyo Iskaashiga Caalamiga ah ee dalka maanta oo Arbaco ah.

Doorashadan oo ka dhacday fadhi Midowga Afrika ee ka socda Addis Ababa, ayaa calaamad u ah guul diblomaasiyadeed oo u soo hoyatay Soomaaliya iyadoo hiigsaneysa inay door weyn ku yeelato qaab-dhismeedka amniga gobolka.

"Doorashadani waxay ka tarjumaysaa kalsoonida ay dowladaha xubnaha ka ah Midowga Afrika u muujiyeen Soomaaliya," ayay tiri Wasaaradda Arrimaha Dibadda oo bayaan soo saartay. Wasaaraddu waxay muujisay "mahadnaq dhab ah" oo ay u dirtay dowladihi taageeray, iyadoo si gaar ah u xustay "midnimada iyo wadajirka" ee urur goboleedka Bariga Afrika.

Soomaaliya waxay ku biiraysaa golaha ka kooban 15-ka xubnood iyadoo diiradda saari doonta iskaashiga la dagaallanka argagixisada, ka hortagga colaadaha, iyo soo kabashada colaadda ka dib.

Ka mid noqoshadaan waxay ku soo beegmaysaa xilli Soomaaliya ay si tartiib tartiib ah ula wareegayso mas'uuliyadda amniga gudaha ee ay hayeen ciidanka nabad ilaalinta Midowga Afrika. Golaha Nabadda iyo Amniga ee Midowga Afrika waa hay'adda qaaradda ee mas'uulka ka ah ilaalinta nabadda iyo xasilloonida, taas oo awood u leh inay dirto hawlgallo nabadeed iyo inay soo rogto cunaqabatayn.