MUQDISHO (Dawan) — Wasaaradda Gaashaandhigga Soomaaliya ayaa Arbacadii sheegtay in Midowga Yurub uu ku wareejiyay qalab milateri iyo xarumo casri ah oo lagu kordhiyay Xarunta Tababarka Dhagabadan ee Muqdisho. Deeqdan oo qayb ka ah taageerada amni ee Midowga Yurub uu siiyo Soomaaliya ayaa lagu wareejiyay Wasaaradda munaasabad ka dhacday xaruntaasi.
Munaasabadda waxaa ka qaybgalay Wasiirka Gaashaandhigga Soomaaliya, Axmed Macallim Fiqi, iyo masuuliyiin sare oo ka socday Midowga Yurub, oo uu hoggaaminayay Jonas Jonsson, Madaxa Qaybta Adeegga Dibadda ee Midowga Yurub, iyo Danjiraha Midowga Yurub ee Soomaaliya, Karin Johansson.
Qalabka la wareejiyay ayaa isugu jira gaadiid iyo agab kale oo muhiim u ah taageerada Ciidanka Xoogga Dalka Soomaaliyeed (SNA), kuwaas oo dagaal adag kula jira kooxda Al‑Shabaab.
“Wasiir Fiqi ayaa u mahadceliyay Midowga Yurub taageerada joogtada ah, isagoo xusay in deeqdan ay ku soo beegantay xilli muhiim u ah howlgalka ciidamada Soomaaliya ee ka dhanka ah Al‑Shabaab iyo dadaallada lagu xasilinayo deegaannada la xoreeyay,” ayaa lagu yiri qoraalka ka soo baxay Wasaaradda Gaashaandhigga.
Deeqdan ayaa noqotay tii ugu horreysay ee Midowga Yurub uu sanadkan 2025 siiyo ciidamada Soomaaliya, iyadoo markii u dambeysay ay ahayd 7‑dii November 2024.
