Muqdisho (Dawan) – Soomaaliya ayaa ku guuleysatay isku darka Hay'adda Aqoonsiga iyo Diiwaangelinta Qaranka (NIRA) iyo Hay'adda Socdaalka iyo Jinsiyadda, taasoo ah tallaabo lagu casriyeeynayo nidaamyada diiwaangelinta shacabka iyo socdaalka ee dalka.
Midayntaan waxay ujeedadeedu tahay in la fududeeyo isku xirka xogta Kaarka Aqoonsiga qaranka iyo tan baasaboorrada, oo ay mideesnaandaan xogaha shaqsiga ah ee labada hay'adood, iyadoo la hagaajinayo waxtarka iyo amniga muwaadiniinta Soomaaliyeed.
Xukuumadda ayaa tallaabadan ku tilmamatay mid muhiim ah intii lagu guda jiray tababar sabtidii loo qabtay shaqaalaha socdaalka ee safarada Soomaaliya ee Muqdisho, taasoo lagu fahan-siinayey wada shaqeenta nidaamkan cusub, oo shaqadiisu ay bilaaban doonto bilowga bisha soo socota.
"Isku darka Hay'adda Aqoonsiga Qaranka iyo Waaxda Socdaalka waa guul aad u muhiim ah oo u ah Soomaaliya. Habkani isku xiran wuxuu ka dhigi doonaa habka mid ammaan ah, hufan, oo isdhexgal ah," ayuu yiri Wasiir Dowlaha Arrimaha Dibadda, Cali Cumar Clai Balcad.
Sida wasiirku sheegay, inkastoo nidaamka dad-dhigista iyo Tirakoobka Xaaladaha Madaniga, oo asna diiwaangelin leh, uusan hadda ku xirnayn nidaamkaan, haddana waxa uu sheegay in lagu xiro doono, oo ay si wadajir ah u shaqeyn doonaan. "Nidaamka Dad-dhigista, wuxuu dhawaan diyaar u noqon doonaa, waxaana ku shaqeynaynaa si aan u dhamaystirno midaynta guud ahaan dhammaan gobollada," ayuu yiri wasiir Cumar.
