Soomaaliya oo Luuqadda Sawaaxiliga ku daraysa Manhajka Waxbarashada

Muqdisho, 7 Oktoobar 2025 — Soomaaliya ayaa qorsheynaysa in luuqadda Sawaaxiliga (Kiswahili) lagu daro manhajka waxbarashada dalka, sida ay masuuliyiinta dowladda ku sheegeen shirka Ururka Bulshada Bariga Afrika (EACON 2025) oo maanta ka furmay Muqdisho.

Tallaabadan ayaa looga gol leeyahay in la xoojiyo isdhexgalka gobolka iyo in kor loo qaado aqoonta luuqadda Sawaaxiliga ee dadka Soomaaliyeed.

Wasiirka Waxbarashada, Dhaqanka iyo Tacliinta Sare Farah Cabdulkadir oo ka hadlayey madasha xilli uu ku subna amadxweynah Soomaliya Xasan Sheekh Maxamuud ayuu sheegay in siyaasaddan cusub lagu hubinayo in dad badan oo Soomaaliyeed ay bartaan Sawaaxiliga, laguna gaaro heer ka sarreeya dadka ku hadla Ingiriisiga.

“Luuqada bulshada bariga afrika ay ku hadasho ee Sawaaxiliga ayaan wadnaa in Waxbarashadeena lagu barto oo ay dadka Soomaaliyeed ee afka awaaxiliga ku hadla ay ka bataan kuwa af-Ingiriiska ka ku hadla,” ayuu yiri Wasiirka.

Madaxweynaha Soomaaliya, Xasan Sheekh Maxamuud, ayaa si buuxda u soo dhoweeyay tallaabadan, isagoo ugu baaqay jaamacadaha dalka, gaar ahaan Jaamacadda Umadda Soomaaliyeed, in dedaal xooggan geliyaan luuqadda Sawaaxiliga.“Afka Sawaaxiliga waa inaan dhalqangelinaa oo aan horumarinaa,” ayuu yiri Madaxweynaha.

Madaxweyne Xasan Sheekh ayaa xusay in Soomaaliya oo si rasmi ah uga mid noqotay Ururka Bulshada Bariga Afrika dhamaadkii 2023, ay muhiim tahay in la qaato luuqadda Sawaaxiliga, isagoo tusaale u soo qaatay sidii luuqadda Carabiga loogu isticmaalay dalka markii ay Soomaaliya ka mid noqotay Ururka Carabta.

Siyaasaddan ayaa la jaanqaadaysa dadaallada hogaamiyeyaasha EAC ee lagu doonayo in luuqadda Sawaaxiliga lagu isticmaalo dhammaan hay’adaha ururka. In kasta oo Ingiriisigu yahay luuqadda rasmiga ah ee ugu weyn, haddana Sawaaxiliga waxaa ku hadla in ka badan 150 milyan oo qof oo ku nool Bariga iyo Bartamaha Afrika.

Haddii la hirgeliyo, ku darista Sawaaxiliga manhajka waxbarashada Soomaaliya waxay noqon doontaa tallaabo dalka u dhigaysa siyaasadaha waxbarashada iyo luuqadda ee ay la leeyihiin waddamada deriska, isla markaana kor u qaadaysa iskaashiga dhaqanka, ganacsiga, iyo wada shaqeynta Bariga Afrika oo dhan.